सकाळ न्यूज नेटवर्क
नवी दिल्ली, ता.८ ः आम आदमी पक्षाला रामराम करत भाजपमध्ये प्रवेश केलेले खासदार राघव चढ्ढा यांच्याकडे आगामी पंजाब विधानसभा निवडणुकीपूर्वी मोठी जबाबदारी दिली जाण्याची शक्यता वर्तवली जात आहे.
चढ्ढा यांनी आज पंतप्रधान नरेंद्र मोदी यांची भेट घेत विविध विषयांवर चर्चा केली. शिरोमणी अकाली दलाचे नेते सुखबीर बादल यांनीही अलीकडेच मोदी यांची सदिच्छा भेट घेतली होती. या भेटीनंतर अकाली दल पुन्हा ‘एनडीए’त परतणार काय, अशीही चर्चा सुरु आहे.
पंजाबच्या विधानसभा निवडणुकीला सहा महिन्यांपेक्षा कमी कालावधी राहिला आहे. अंतर्गत बंडाळीमुळे काँग्रेस पक्ष त्रस्त असून विद्यमान सत्ताधारी आम आदमी पक्षासाठी देखील फारसे अनुकूल वातावरण नाही. या पार्श्वभूमीवर राज्यात व्यापकपणे शिरकाव करण्याच्या योजनेवर भाजप काम करत असल्याचे सूत्रांचे म्हणणे आहे. ‘आप’मध्ये सक्रिय असताना चढ्ढा यांच्याकडे पंजाबची जबाबदारी होती. त्यामुळे विधानसभा निवडणुकीपूर्वी भाजपकडून त्यांना मोठी जबाबदारी दिली जाण्याची शक्यता आहे.