वाघोली : अनाथांना आधार देणे, त्यांचे पुनर्वसन करणे हे माहेरचे काम कौतुकास्पद आहे. मला या कार्यक्रमाला उपस्थीत राहण्याचा मान मिळाला. हे माझे भाग्य समजतो. असे प्रतिपादन पद्मविभूषण शास्त्रज्ञ डॉ. रघुनाथ माशेलकर यांनी केले.

आव्हाळवाडी- मांजरी येथील माहेर संस्थेच्या २७ व्या वर्धापन दिना निमित्त आयोजीत कार्यक्रमात ते बोलत होते. यावेळी माहेरच्या संस्थापिका लुसी कुरीयन, डॉ गिरीष कुलकर्णी, डॉ रविंद्र सेठिया, डॉ. राणी खेडीकर, डॉ. जयंतीलाल तलेसरा, नंदिता अंबिके, डॉ निकोला पवार, माहेरच्या अध्यक्षा हिरा बेगम मुल्ला, मांजरीचे सरपंच रुपेश उंद्रे, विश्वास साळवी, डॉ सदाशिव गाडेकर ,डॉ  दिडगावकर आदी उपस्थित होते.

परिस्थिती यशाच्या कधीच आड येत नाही. तुमचे कर्तुत्व तुम्हाला यशाकडे नेते. सिस्टर लुसी कुरियन यांच्यात करुणा हा गुण आहे. यामुळेच त्या ही संस्था उभी करू शकल्या. असेही डॉ माशेलकर म्हणाले. माहेरचा मुलगा आर्यन पवार याने डॉ माशेलकर यांचे काढलेले स्केच त्यांना भेट देण्यात आले. त्याच्या स्केचचे प्रदर्शनही भरविण्यात आले होते.

संस्थेच्या मुली, महिला यांनी विविध कार्यक्रम सादर केले.

सुनील कांबळे यांनी प्रास्ताविक केले. रमेश दुतोंडे व तालिका ॲन्थनी यांनी सुत्रसंचालन केले. योगिता म्हैत्रे यांनी आभार मानले.

आज फिर जिने की तमन्ना हैं

माहेर मधील ज्येष्ठ महिला व नागरिकांनी जुन्या गाण्यावर नृत्य सादर केले. आज फिर जिने की तमन्ना हैं या गाण्यावर ही त्यांनी नृत्य सादर केले. त्याला उपस्थितांनी टाळ्या वाजवून साथ दिली.