राहुल गांधींकडून राजकीय पोळी भाजण्याचे काम

राधाकृष्ण विखे पाटील ः प्रतिमा खराब झाल्याने विद्यार्थ्यांचा वापर

अहिल्यानगर, ता.२२ ः काँग्रेस नेते राहुल गांधी यांच्याकडून सीजेपी आंदोलनाच्या पार्श्वभूमीवर उपक्रम हाती घेऊन स्वतःची राजकीय पोळी भाजून घेण्याचे काम सुरू आहे. लोकसभेत सलग तीन वेळा पराभव झाल्याने आणि जनतेतील प्रतिमा खराब झाली असल्याने या आंदोलनाचा उपयोग करून घेत असल्याची टीका पालकमंत्री राधाकृष्ण विखे पाटील यांनी केली. शहरात पत्रकारांशी संवाद साधताना ते बोलत होते.
पुण्यात राहुल गांधी यांचा ‘छात्रों की गुंज’ हा कार्यक्रम होत आहे. याबाबत विखे पाटील यांना विचारले असता ते म्हणाले, की राहुल यांच्याकडून विद्यार्थी आंदोलनाआड राजकारण केले जात आहे. मात्र, विद्यार्थ्यांना ते काय आहेत, हे माहिती आहे. त्यामुळे त्यांचे कोणीही ऐकायला तयार नाही. सततच्या पराभवामुळे विद्यार्थी आंदोलनाचा ते उपयोग करून घेत आहेत. आताच यांना अशा गोष्टी का सुचतात. त्याबरोबरच पैसे देऊन विद्यार्थ्यांना बोलवण्यात आल्याची जी चर्चा सुरू आहे, ती फार गंभीर आहे.

...
नीट परीक्षा राज्य सरकारनेच घ्याव्यात

नीट परीक्षेच्या गोंधळाबाबत विखे पाटील यांना विचारणा केली असता या परीक्षेबद्दल जे प्रश्न निर्माण होत आहेत, त्याबद्दल मी स्वतः केंद्र शासनाकडे वेगळा प्रस्ताव देणार आहे. अशा परीक्षा या राज्य सरकारनेच घ्याव्यात, अशी मागणी मी करणार आहे.
---

पत्रकार थोरात यांची भेट

पत्रकार सुशील थोरात यांच्यावर काही गुंड प्रवृत्तीच्या व्यक्तींनी हल्ला करून त्यांना मारहाण केली होती. पालकमंत्री विखे यांनी आज थोरात यांची रुग्णालयात जाऊन भेट घेतली. यावेळी माध्यमांशी बोलताना ते म्हणाले, पाइपलाइन रोडवर अवैध धंदे चालतात, पोलिसांना त्यावर अंकुश ठेवता आलेला नाही. पत्रकार हे समाज जागृतीचे काम करतात; परंतु त्यांच्यावरच असे भ्याड हल्ले होत असतील, तर ते चुकीचे आहे. पत्रकार थोरात यांना मारहाण करणारे आरोपी स्थानिक आहेत, आतापर्यंत त्यांना अटक व्हायला हवी होती. उलट, आरोपींना फरार होण्यात पोलिसांनीच मदत केली की काय, अशी शंका आहे. संबंधित आरोपींवर मोक्कांतर्गत कारवाई होणे आवश्‍यक असल्याचे विखे यांनी स्पष्ट केले.
--------------