पुणे - नैऋत्य मोसमी वाऱ्यांची (मॉन्सून) वाटचाल अडखळली असली तरी राज्यात तुरळक ठिकाणी हलका ते जोरदार पाऊस पडत आहे. त्यामुळे पुणे, सातारा, रत्नागिरी, रायगड सिंधुदुर्गसह विदर्भातील बहुतांश जिल्ह्यांत बुधवारी (ता. १९) जोरदार पावसाचा ‘यलो अलर्ट’ हवामान खात्याने दिला आहे.

कोकण, मध्य महाराष्ट्र, मराठवाडा, विदर्भात तुरळक ठिकाणी गेल्या चोवीस तासांमध्ये हलक्या ते जोरदार सरी कोसळल्या. नाशिकमधील हर्सूल येथे ७७ आणि रत्नागिरीतील खेड येथे ७१ मिलिमीटर पावसाची नोंद होत अतिवृष्टी झाली. विदर्भात अद्यापही दमदार पावसाची प्रतीक्षा आहे. मॉन्सून दाखल झालेल्या भागातही पावसाने अपेक्षित जोर धरलेला नाही.

उन्हाचा चटका वाढला

पावसाची उघडीप असलेल्या भागात ढगाळ हवामानासह उन्हाचा चटका आणि उकाडा कायम आहे. पावसाअभावी विदर्भात कमाल तापमान चाळीशीपार गेला. राज्यात सर्वाधिक कमाल तापमान विदर्भातील ब्रह्मपुरी येथे ४१.३ अंश तापमानाची नोंदले गेले. चंद्रपूर येथे पारा ४० अंशांपार गेला.

कोकणातील ठाणे, मुंबई, रायगड, रत्नागिरी, सिंधुदुर्ग जिल्ह्यांसह मध्य महाराष्ट्रातील पुणे, सातारा जिल्ह्यांच्या घाटमाथ्यावर बुधवारी (ता. १८) जोरदार पावसाचा इशारा देण्यात आला आहे. तर विदर्भात तुरळक ठिकाणी जोरदार वारे, विजांसह पावसाचा इशारा हवामान विभागाने दिला आहे.

या जिल्ह्यात यलो अलर्ट

• ठाणे, मुंबई, रायगड, रत्नागिरी, सिंधुदुर्ग, पुणे, सातारा

• वादळी वारे, विजांसह पावसाचा इशारा (यलो अलर्ट)

• बुलडाणा, अकोला, अमरावती, वाशीम, यवतमाळ, वर्धा, नागपूर, भंडारा, गोंदिया, चंद्रपूर, गडचिरोली