कॅन्टोन्मेंट- जोरदार वाऱ्याचा झोत त्यात मुसळधार पाऊस अचानक आल्याने शंकर शेठ रोड वरील आनंद पार्क सोसायटीची भिंत कोसळली आहे. यावेळी आनंद पार्क सोसायटीच्या शेजारील मॅजेस्टिक लँडमार्कस् बिल्डरचे बांधकाम सुरू आहे आहे.

यावेळी बिल्डर कडून सोसायटीच्या भिंतीलगत विना फाउंडेशन लोखंडी खांब व पत्रे उभारण्यात आले होते. हे काम चुकीच्या पद्धतीने केल्याने वाऱ्याच्या झोताने सोसायटीच्या आतील परिसरात हे पत्रे व खांब भिंतीवर जोरदारपणे कोसळले. त्यामुळे सोसायटीची 100 फुटाची संरक्षण भिंत कोसळली.

या जागेत सोसायटीची एक एकर मोकळी जागा आहे. आणि या मोकळ्या जागेत त्यांनी उद्यान उभारले आहे. या उद्यानात व मोकळ्या जागेत सतत लहान मुले खेळत असतात.

बिल्डरच्या या चुकीच्या कामामुळे सोसायटीचे मोठ्या प्रमाणात नुकसान झाले असून लहान मुले व ज्येष्ठ नागरिकांच्या जीवितास धोका असल्याची शक्यता सोसायटीतील रहिवासी सागर मुनोत यांनी वर्तविली आहे.