पुणे : राज्यात 18 ते 20 मार्चदरम्यान मेघगर्जनेसह पाऊस पडणार असल्याचा इशारा भारतीय हवामान विभागाने दिला आहे. दरम्यान आगामी दोन दिवस शहरात अंशत: ढगाळ वातावरण राहील असा अंदाज विभागातर्फे वर्तविण्यात आला आहे. पुढील दोन दिवस पुण्यासहित आसपासच्या परिसरात आकाश मुख्यत: निरभ्र राहणार असून, दुपारनंतर अथवा संध्याकाळी ढगाळ वातावरण निर्माण होईल'' असा इशारा विभागातर्फे देण्यात आला आहे. दरम्यान हवामान विभागाने घेतलेल्या नोंदीनुसार, शहरात 36.6 अंश सेल्सिअस इतके कमाल तापमान तर 16.3 अंश सेल्सिअस इतके किमान तापमान नोंदविण्यात आले.

हवामान विभागाने दिलेल्या माहितेनुसार, अरबी समुद्राकडून येणारे बाष्पयुक्त वारे आणि दक्षिणेकडून वाहणारे वारे एकत्र आल्याने होणाऱ्या अंतरक्रियेच्या प्रभावामुळे राज्यात पावसासाठी अनुकूल स्थिती निर्माण होण्याची शक्‍यता आहे. त्यामुळे 18 ते 20 मार्चदरम्यान मध्यमहाराष्ट्र, मराठवाडा या भागांमध्ये काही ठिकाणी मेघगर्जनेसह पाऊस पडेल, तर विदर्भात काही ठिकाणी गारांसह पाऊस पडणार असल्याची शक्‍यता वर्तविण्यात आली आहे.