पुणे : रिक्षा चालकांच्या विरोधामुळे मागच्या काही दिवसांपासून चर्चेत असलेली बाइक टॅक्सी ॲप चालवणारी कंपनी 'रॅपीडो' विरोधात पुण्यातील बंडगार्डन पोलिस ठाण्यात गुन्हा दाखल करण्यात आला आहे. भारतीय दंडात्मक कलम ४२०, ५०५, ११४ अन्वये प्रमाणे कलमवाढ करुन रॅपीडो कंपनी व रॅपीडो कंपनीच्या दोन अधिकाऱ्यांचा आरोपी म्हणून यामध्ये समावेश करण्यात आला आहे.

यापूर्वी बेकायदेशीरपणे प्रवासी वाहतुक करून घेऊन त्याच्या मोबदल्यामध्ये रॅपीडो कंपनी आर्थिक फायदा करुन घेत असल्याने रॅपीडो कंपनीचे अधिकारी जगदीश पाटील व अन्य अधिकारी यांच्या विरुद्ध बंडगार्डन पोलीस स्टेशन येथे गुन्हा दाखल करण्यात आला होता.

हेही वाचा - जोखीममुक्त व्यवहारांसाठी रिझर्व बँकेचा 'डिजिटल रुपया'

दरम्यान खाजगी दुचाकी वाहनांचा बेकायदेशीरपणे व्यवसायीक वापर करण्यास चिथावणी देऊन, दुचाकी चालकांकडून बेकायदेशीर प्रवासी वाहतुक करुन घेणे, तसेच त्यांना मिळणाऱ्या मोबदल्यामधून शासनाला कोणताही कर न भरता शासनाचीही फसवणुक करीत आहेत असा आरोप करण्यात आला आहे.

यामध्ये रॅपीडो कंपनी व रॅपीडो कंपनीचे अधिकारी अरविंद सांका आणि शांतनु शर्मा यांचाही सहभाग असल्याने अरविंद सांका आणि शांतनु शर्मा यांच्या नावाचाही समावेश करण्यात आलेला आहे. दरम्यान दाखल गुन्ह्याचा पुढील तपास सुरु आहे.