पुणे - सावित्रीबाई फुले पुणे विद्यापीठाच्या मुख्य इमारतीत चित्रित केलेल्या वादग्रस्त ‘रॅप सॉंग’ प्रकरणासाठी उच्चस्तरीय चौकशी समिती गठीत करण्यात आली आहे. या समितीने एका महिन्याच्या आत अहवाल सादर करावा, अशा सूचना विद्यापीठाचे कुलगुरू डॉ. कारभारी काळे यांनी दिल्या आहेत.

विद्यापीठाच्या मुख्य इमारतीच्या आवारात तसेच इमारतीमधील विविध सभागृहांमध्ये वादग्रस्त रॅप सॉंगचे चित्रीकरण करण्यात आल्याचे वृत्त माध्यमांमध्ये प्रसारीत झाले होते. त्यानंतर आता विद्यापीठाने संबंधित घटनेची चौकशी करण्यासाठी माजी पोलीस महासंचालक डॉ. जयंत उमराणीकर यांच्या अध्यक्षतेखाली उच्चस्तरीय समिती स्थापन केली आहे.

या समितीमध्ये विद्यापीठाच्या व्यवस्थापन परिषदेच्या सदस्य बागेश्री मंठाळकर ,आधिसभा सदस्य प्रसेनजीत फडणवीस, प्रतिष्ठित प्राध्यापक निवृत्त कॅप्टन चंद्रशेखर चितळे, आजीवन अध्ययन व विस्तार केंद्राचे संचालक डॉ. विलास आढाव आणि उपकुलसचिव डॉ. मुंजाजी रासवे यांचा समावेश केला आहे. विद्यापीठाच्या आवारात तसेच सभागृहात मद्याची बाटली, तलवार आणि पिस्तूल घेऊन काही तरुणांनी रॅप सॉंगचे चित्रकरण केल्याचे समोर आले होते. या प्रकरणी विद्यापीठाने पोलिसांकडे तक्रार दिली असून पोलिसांनी संबंधित तरुणांवर गुन्हा दाखल केला आहे.