पुणे : संत गाडगेबाबा ग्रामस्वच्छता अभियानांतर्गत दरवर्षी घेण्यात येणाऱ्या राष्ट्रसंत तुकडोजी महाराज स्वच्छ ग्राम स्पर्धेचा विभागस्तरीय निकाल गुरुवारी (ता. २२) जाहीर झाला. स्पर्धेत सातारा जिल्ह्यातील बनवडी (ता. कऱ्हाड) ग्रामपंचायतीने पुणे विभागात अव्वल स्थान पटकावले आहे. या ग्रामपंचायतीला विभागस्तरीय प्रथम क्रमांकाचा रोख १० लाख रुपयांचा पुरस्कार जाहीर झाला. पुणे जिल्ह्यातील काळवाडी (ता. जुन्नर) ग्रामपंचायतीला विभागून द्वितीय क्रमांकाचा पुरस्कार जाहीर झाला.

कोरोना संसर्गाच्या कालावधीतील म्हणजेच सन २०२०-२१ आणि २०२१-२२ या दोन वर्षांचा हा संयुक्त निकाल जाहीर झाला. यामुळे सुमारे तीन वर्षांपासून असलेली निकालाची प्रतीक्षा अखेर संपली. यासाठी निवड झालेल्या गावांना एका खास समारंभात पुरस्कारांनी गौरविण्यात येणार आहे. मात्र दोन्ही वर्षांचा निकाल संयुक्तपणे जाहीर झाल्याने अनेक पात्र गावांवर अन्याय झाला आहे. दोन्ही वर्षांची तपासणी संयुक्तपणे एकावेळी केली असली, तरी वर्षनिहाय दोन स्वतंत्र निकाल करणे आवश्‍यक होते.

प्रत्यक्षात तसे झालेले नसल्याची प्रतिक्रिया पुणे जिल्ह्यातील सरपंचांनी दिली आहे. विभागस्तरीय प्रथम पुरस्कार रोख दहा लाख, द्वितीय पुरस्कार आठ लाख आणि तृतीय पुरस्कार सहा लाख रुपयांचा असतो. यानुसार यासाठी निवड झालेल्या गावांना दरवर्षी पुरस्काराची रक्कम दिली जाते. या नियमानुसार प्रत्येकी दहा लाखांचे दोन, आठ लाखांचे दोन आणि सहा लाखांचे दोन पुरस्कार जाहीर होणे अपेक्षित होते. प्रत्यक्षात तसे होऊ शकले नसल्याचे सरपंचांनी सांगितले. यासंदर्भात पुणे विभागाचे विकास शाखेचे उपायुक्त विजय मुळीक यांच्याशी भ्रमणध्वनीवरून संपर्क साधला असता त्यांनी प्रतिसाद दिला नाही.

स्वच्छ ग्राम स्पर्धेचा सविस्तर निकाल : बनवडी, ता. कऱ्हाड, जि. सातारा (प्रथम), काळवाडी, ता. जुन्नर, जि. पुणे व वाटंगी, ता. आजरा, जि. कोल्हापूर (विभागून द्वितीय), नांगोळे, ता. कवठे महांकाळ, जि. सांगली व खंबाळे, ता. खानापूर, जि. सांगली (विभागून तृतीय).

विभागस्तरीय विशेष पुरस्कार

• स्व. वसंतराव नाईक पुरस्कार : बनवडी, ता. कऱ्हाड, जि. सातारा

• स्व. बाबासाहेब आंबेडकर पुरस्कार : वाटंगी, ता. आजरा, जि. कोल्हापूर

• स्व. आबासाहेब खेडेकर पुरस्कार : भोसे, ता. पंढरपूर, जि. सोलापूर