पुणे - ऑनलाइन रेशन कार्ड तहसील कार्यालयातून दिले जाते. मात्र, चक्‍क नाशिक येथील एका खासगी केंद्रातून रेशन कार्ड दिल्याचा प्रकार उघड झाला आहे. रेशनिंग कृती समितीच्या कार्यकर्त्यांनी हा प्रकार समोर आणला असून, त्याची पाळेमुळे राज्यात पसरल्याची शक्‍यता व्यक्‍त करण्यात येत आहे. 

रेशनिंग कृती समितीचे कार्यकर्ते गोरख आव्हाड यांच्या म्हणण्यानुसार, निफाड तालुक्‍यातील अरुण सांगळे यांना रेशन कार्ड तयार करावयाचे होते. त्यासाठी त्यांनी तेथील तहसील कार्यालयात संपर्क साधला; परंतु त्यांना जिल्ह्याच्या ठिकाणी कार्ड मिळेल, असे सांगण्यात आले. त्यामुळे ते एका खासगी केंद्रात गेले. तेथून त्यांना कार्ड देण्यात आले. 

 ताज्या बातम्यांसाठी डाऊनलोड करा ई-सकाळचे ऍप

महत्त्वाचे म्हणजे लॉग इन, पासवर्ड वापरण्याचा अधिकार तहसील कार्यालयातील अधिकारी, कर्मचाऱ्यांना आहे. महा-ई-सेवा केंद्रांनाही तो दिला जात नाही. मग खासगी केंद्रातून रेशन कार्ड कसे तयार झाले, हा प्रश्‍न आहे. रेशनिंग कृती समिती आणि झटका डॉट ऑर्ग यांच्या वतीने चालविण्यात येणाऱ्या हेल्पलाइनकडे हे प्रकरण आले. त्यावेळी ही माहिती समोर आली. 

या संदर्भात आव्हाड यांनी नाशिक येथील पुरवठा विभाग आणि निफाडच्या तहसील कार्यालयातील अधिकाऱ्यांकडे विचारणा केली. "तहसील कार्यालयातून रेशन कार्ड दिले जाते. गैरप्रकार झाल्याचे निष्पन्न झाल्यास संबंधित केंद्रचालकावर कारवाई करण्यात येईल,' असे त्यांना सांगण्यात आले; परंतु हे केंद्र अद्याप सुरूच आहे. 

जगभरातील इतर बातम्या वाचण्यासाठी येथे क्लिक करा

दरम्यान, पुणे जिल्ह्यात असा कोणताही प्रकार समोर आलेला नाही, असे पुण्याचे जिल्हा पुरवठा अधिकारी भानुदास गायकवाड यांनी सांगितले. 

हेल्पलाइनद्वारे नागरिकांना रेशनिंगबाबतच्या अडचणी सोडविण्यास मदत होत आहे. नागरिकांच्या समस्यांमुळे रेशनिंग व्यवस्थेमधील ढिसाळ कारभार समोर आला. सध्या केशरी कार्डधारकांना जुलै, ऑगस्ट महिन्याचे धान्य न मिळाल्याच्या तक्रारी वाढल्या आहेत. 
- मयूरी धुमाळ, झटका डॉट ऑर्ग 
 

हेल्पलाइन क्रमांक -  18001024103