पुणे : राज्यात पावसाने थैमान घातले असून अनेक ठिकाणी संततधार पावसामुळे जनजीवन विस्कळीत झाले आहे. दरम्यान हवामान विभागाने येत्या ४८ तासांत जोरदार पावसाचा इशारा दिल्याने प्रशासन अलर्ट मोडवर गेले आहे. पुण्यात उद्यापासून दोन दिवस अतिवृष्टीची शक्यता असल्याने आता पुणे पालिका प्रशासन देखील सज्ज झाली आहे. खाजगी कंपन्यांमध्ये काम करणाऱ्या कर्मचाऱ्यांना देखील वर्क फ्रॉम होम देण्यात यावे असे अवाहन पुणे मनपा प्रशासनाकडून करण्यात आले आहे.

दरम्यान हवामान विभागाने पावसाच्या इशारा दिला गेल्याने, उद्या पुणे शहरातील शाळा बंद ठेवण्याचा निर्णय घेण्यात आला आहे. तसेच पुण्यात मोठ्या संख्येने खासगी कपन्यांमध्ये लोक काम करतात. या पार्श्वभूमिवर पुणे महानगरपालिकेने शहरातील सर्वच खाजगी कंपन्या आणि आयटी कंपन्यांना देखील त्यांच्या कर्मचारी वर्गाला वर्क फ्रॉम होम देण्याच आवाहन करण्यात आले आहे. हवामान विभागाने उद्या आणि परवा पुणे जिल्ह्यात रेड अलर्ट जारी केला आहे, त्याच पार्श्वभूमीवर सुरक्षेच्या दृष्टीने हे आवाहन करत असल्याचे महानगरपालिका प्रशासनाने सांगितले आहे.

पुणे शहरात हवामान खात्याने अतिवृष्टी होण्याची शक्यता वर्तविली आहे. त्यामुळे, बालवाडी, प्राथमिक, माध्यमिक तसेच, अनुदानित व विनाअनुदानित शाळांना १३ व १४ जुलैपर्यत दोन दिवस सुट्टी जाहीर करण्यात आली आहे.