पुणे : पुण्यात गेल्या दहा दिवसा पडलेल्या पावसा एवढा पाऊस उद्या (गुरुवारी) एका दिवासात पुणे जिल्ह्यात कोसळण्याची शक्यता असून त्यासाठी हवमान खात्याने आज रेड अलर्ट जाहीर केला आहे. गेल्या दहा दिवसा पुणे शहरात सुमारे 200 मिलीमीटर पाऊस पडला आहे. तेवढाच पाऊस उद्या एका दिवासात मुख्यत्वे जिल्ह्यातील घाटमाथ्यावर कोसळणार आहे. 

 या बाबत 'सकाळ'ला अधिक माहिती देताना हवामान खात्यातील शास्त्रज्ञ डॉ. अनुपम कश्‍यपी म्हणाले, "बंगालच्या उपसागरात अतितीव्र कमी दाबाचा पट्टा तयार झाला आहे. तो पूर्व किनारपट्टीकडे सरकत आहे. ओरिसा, पश्‍चिम बंगाल या मार्गे तो विदर्भाच्या दिशेने पुढे येत आहे. त्यामुळे पावसाची जोर वाढण्याची शक्‍यता आहे. पुणे जिल्ह्यातील घाटमाथ्यांवर पुढील दोन दिवसांमध्ये काही भागात पावसाच्या मुसळधार सरी पडतील. तेथे एका दिवसात 20.5 सेंटीमीटरपेक्षा जास्त पावसाची नोंद होईल. त्यामुळे या भागात "रेड ऍलर्ट' देण्यात आला आहे.'' 

का वाढणार पाऊस? 
नैर्ऋत्य मोसमी वाऱ्याची (मॉन्सून) अरबी समुद्र आणि बंगालच्या उपसागर अशा दोन्हीही शाखाही सक्रिय आहेत. त्यामुळे पुढील दोन दिवसांमध्ये पावसाचा जोर वाढण्याची शक्‍यता आहे. त्याच वेळी पश्‍चिमेकडून येणाऱ्या वाऱ्याचा प्रभाव वाढत आहे. त्याचा थेट परिणाम मध्य महाराष्ट्रावर होत आहे. त्यामुळे या भागात पाऊस वाढत आहे. दक्षिण महाराष्ट्रापासून केरळपर्यंत एक कमी दाबाचा पट्टा तयार झाला आहे. त्याच्या परिणामामुळेही पुण्यात पाऊस पुन्हा वाढणार आहे. तसेच, मॉन्सून ट्रफ दक्षिणेकडे सरकला आहे. हवामान घटकाच्या विश्‍लेषणावरून बुधवारी संध्याकाळपासून ते शुक्रवारी (ता. 9) दुपारपर्यंत पुणे आणि परिसरात मुसळधार पाऊस पडण्याची शक्‍यता आहे, डॉ. कश्‍यपी यांनी "सकाळ'शी बोलताना दिली. 

असा पडणार पाऊस 
8 ऑगस्ट : मुसळधार पावसाची शक्‍यता 
9 ऑगस्ट : पावसाचा जोर वाढण्याचा इशारा 
10 ऑगस्ट : काही भागात जोरदार पाऊस पडेल 
11 ऑगस्ट : मध्यम ते हलक्‍या स्वरूपाच्या पावसाची शक्‍यता