जुन्नर : मातीच्या ढिगाऱ्याखाली अडकलेल्या परप्रांतीय कुटूंबाची जुन्नरमधील तरुणांकडून सुटका करण्यात आली आहे. या तरुणांचे सर्वत्र कौतुक होत आहे. जुन्नर शहरातील रविवार पेठ येथील ग्रामदैवत सिद्धिविनायक मंदिराजवळील मातीच्या जुन्या घराची भिंत शुक्रवारी ता.रोजी रात्री अचानक कोसळली.

मातीच्या ढिगाऱ्या खाली सापडलेले सहा जणांचे कुटुंब परिसरातील तरुणांनी दाखवलेली तत्परता व प्रसंगावधानामुळे वाचले आहे. देव तारी त्याला कोण मारी या म्हणीची प्रचिती या घटनेने आली आहे. संत कबीरनगर उत्तरप्रदेश येथील सहानी हे परप्रांतीय कुटुंब उदरनिर्वाहासाठी गेल्या पाच-सहा वर्षांपासून येथे राहत असल्याचे स्थानिक नागरिकांनी सांगितले. सहानी हे रंगकाम करतात.

कुटुंबातील विनीत सहानी वय- ४०, पत्नी शोभा वय- ३५ वर्ष, व मुले प्रतीक्षा-११ वर्ष, श्रेया-१० वर्ष, श्वेता- ५ वर्ष, व विवेक-१८ महिने असे सहा सदस्य या घटनेत किरकोळ जखमी झाले आहेत. त्यांच्यावर जुन्नर येथील ग्रामीण रुग्णालयात उपचार सुरू आहेत.

भिंत कोसळल्याचा मोठा आवाज होताच जवळच राहणारे अरुण शिंदे, तेजस शिंदे, श्रेयस शिंदे, ऋषिकेश जोगळेकर, अभय पाठक, भागेश गाडेकर, महेश घोडेकर, हर्षवर्धन कुऱ्हे, मंदार ढोबळे, बंडू कर्पे, मिलिंद झगडे,अनिल सावंत आदी युवकांनी मातीच्या ढिगारयाखालून सगळ्यांना सुखरूप बाहेर काढले . तरुणांनी दाखवलेल्या तत्परतेचे कौतुक होत आहे.