पुणे - पुणे महानगरपालिकेच्या ऑनलाइन विभागाकडे करण्यात आलेल्या तक्रारीची त्या विभागाने तत्काळ दखल घेतली. परंतु, गणेशोत्सवापूर्वी ते काम होणे अपेक्षित असतानाही ते काम अद्यापही ‘जैसे थे’च अवस्थेत आहे. यामुळे पुणे महानगरपालिकेकडून कामाचा वेळकाढूपणा दिसून आला.

राज्यभरातून श्रीमंत दगडूशेठ हलवाई गणपतीच्या दर्शनासाठी लाखो भाविक येत असतात. त्यामध्ये लहान मुलांचाही मोठ्या प्रमाणात समावेश असतो. लालमहाल चौकाकडून दगडूशेठ हलवाई गणपतीकडे जाणाऱ्या रस्त्यावर मधोमध असणाऱ्या ड्रेनेजच्या झाकणाला छिद्र पडले आहे. चालताना यामध्ये लहान मुलांचा पाय अडकून दुर्घटनेचा धोका जाणवत होता. त्यामुळे तत्काळ दखल घेणे अपेक्षित होते. मात्र, गेल्या दहा दिवसांमध्ये हे काम झालेच नाही. ड्रेनेजच्या झाकनाचे छायाचित्र १३ सप्टेंबर रोजी महापालिकेच्या ट्विटवरवर अपलोड करण्यात आले होते. महानगर विभागाच्या ऑनलाइन विभागाने १४ सप्टेंबर रोजी तक्रारीची दखल घेतली. टोकन क्रमांक ५२७७ असल्याचे कळविलेही. मात्र, अद्यापही ते काम ‘जैसे थे’ अवस्थेत आहे. गणेशोत्सवादरम्यान कोणाला दुखापत झाली अथवा नाही, हे समजू शकले नाही. परंतु, सरकारी कामाचा अनुभव नक्कीच आला. पुणे महानगरपालिका नागरिकांना तक्रारींसाठी ऑनलाइन सेवेचा वापर करण्याचा सल्ला सतत देताना दिसते. यासाठी सोशल मीडियाचाही मोठा वापर केला जातो. प्रत्यक्षात कृती मात्र झाली नसल्याचा अनुभव येत आहे.