पुणे - शहरातील वाहतूक कोंडी सोडविण्यासाठी प्रमुख चौक अतिक्रमणमुक्त करा आणि पीएमपी सक्षम करण्यासाठी तातडीने उपायोयजना करा, अशी मागणी राष्ट्रवादी काँग्रेसच्या खासदार ॲड. वंदना चव्हाण यांनी पत्राद्वारे महापालिका आणि पीएमपीकडे गुरुवारी केली. 

शहरातील प्रमुख रस्त्यांवर सध्या वाहतूक कोंडी होत आहे. त्याबाबत ‘सकाळ’ सातत्याने बातम्यांच्या माध्यमातून पाठपुरावा करीत आहे. चव्हाण यांनीही त्याची दखल घेतली आहे. महापालिका आयुक्त सौरभ राव यांना दिलेल्या पत्रात त्यांनी म्हटले आहे, की शहरातील प्रमुख चौकांत 

अतिक्रमणे झाली आहेत, ती तातडीने दूर करण्याची गरज आहे. तसेच खड्डे बुजविणे, वाहतूक नियंत्रक दिव्यांना बॅटरी बॅकअप पुरविणे गरजेचे आहे. वारंवार वाहतुकीची कोंडी होत असलेली ठिकाणे निश्‍चित करून तेथे उपाययोजना करणे गरजेचे आहे. 

लोकसंख्येच्या प्रमाणात पीएमपीकडे बस उपलब्ध नसल्यामुळे प्रवाशांची गैरसोय होत आहे. परिणामी खासगी वाहनांची संख्या वाढत आहे. त्यामुळे नव्या बस घेण्याची रखडलेली प्रक्रिया तातडीने मार्गी लावण्याची गरज आहे. तसेच, आगारांचे विकसन, बसथांबे याबाबतही तातडीने उपाययोजना करा, असे चव्हाण यांनी पीएमपीच्या अध्यक्षा नयना गुंडे यांना पाठविलेल्या पत्रात नमूद केले आहे.