भिगवण (पुणे) : भिगवण स्टेशन (ता. इंदापूर) येथील कोरोनाबाधित महिलेच्या संपर्कातील उर्वरित 25 जणांचा कोरोना चाचणी अहवालही निगेटिव्ह आला आहे. यापूर्वी 18 जणांचा अहवालही निगेटिव्ह आला होता, अशी माहिती इंदापूरच्या तहसीलदार सोनाली मेटकरी यांनी दिली. 

दौंडच्या "एसआरपीएफ'ची आणखी डोखेदुखी वाढली   

भिगवण स्टेशन येथील कोरोनाबाधित महिलेचा गुरुवारी (ता. 30 एप्रिल) उपचारादरम्यान मृत्यू झाला होता. या महिलेच्या कुटुंबातील व संपर्कातील एकूण 43 जणांची कोरोना चाचणी करण्यात आली. त्यापैकी 18 जणांचा अहवाल यापूर्वीच निगेटिव्ह आला होता. उर्वरित 25 जणांच्या अहवालाची प्रतीक्षा होता. चाचणीनंतर दोन दिवसांनंतरही अहवाल न आल्याने नागरिकांची चिंता वाढली होती. अखेर शनिवारी (ता. 2) सायंकाळी उर्वरित सर्व 25 जणांचा अहवालही निगेटिव्ह आल्याने भिगवणकरांनी सुटकेचा निःश्वास सोडला. संपर्कातील सर्वच व्यक्तींची चाचणी निगेटिव्ह आल्याने संबंधित महिलेस कोरोनाचा संसर्ग कोठून झाला, हा प्रश्‍न मात्र अनुत्तरीतच आहे. 

पुण्यातील इतर बातम्या वाचण्यासाठी येथे क्लिक करा

याबाबत तहसीलदार मेटकरी म्हणाल्या, ""कोरोनाबाधित महिलेच्या संपर्कातील व्यक्तींचा अहवाल निगेटिव्ह आला असला, तरी लॉकडाउन सुरूच राहणार आहे. नागरिकांनी घरात थांबून प्रशासनास सहकार्य करावे.'' भिगवणचे सहायक पोलिस निरीक्षक जीवन माने म्हणाले, ""कोरोनाचा वाढता संसर्ग पाहता नागरिकांनी घराबाहेर पडू नये.''