पुणे : महाराष्ट्र राज्य माध्यमिक व उच्च माध्यमिक शिक्षण मंडळातर्फे नोव्हेंबर-डिसेंबरमध्ये घेतलेल्या दहावी आणि बारावीच्या पुरवणी परीक्षेचा निकाल बुधवारी (ता.23) दुपारी एक वाजता जाहीर करण्यात येणार आहे. विद्यार्थ्यांना हा निकाल "www.mahresult.nic.in" या संकेतस्थळावर विषयनिहाय गुणांसह पाहता येणार असून त्या माहितीची प्रत (प्रिंट आउट) काढता येणार आहे, अशी माहिती मंडळाचे सचिव डॉ. अशोक भोसले यांनी दिली आहे.

पुण्याच्या बातम्या वाचण्यासाठी येथे ► क्लिक करा 

राज्य शिक्षण मंडळाच्या पुणे, नागपूर, औरंगाबाद, मुंबई, कोल्हापूर, अमरावती, नाशिक, लातूर आणि कोकण या नऊ विभागीय मंडळांमार्फत दहावी-बारावीच्या पुरवणी परीक्षेचे आयोजन करण्यात आले होते. दहावीची पुरवणी परीक्षा 20 नोव्हेंबर ते 5 डिसेंबर, तर बारावीची परीक्षा 20 नोव्हेंबर ते 10 डिसेंबर दरम्यान झाली होती. या परीक्षेच्या ऑनलाइन निकालानंतर लगेचच दुसऱ्या दिवसापासून दहावी आणि बारावीच्या पुरवणी परीक्षेस प्रविष्ट झालेल्या विद्यार्थ्यांना स्वत:च्या अनिवार्य विषयांपैकी (श्रेणी विषयांव्यतीरिक्त) कोणत्याही विशिष्ट विषयात त्यांना मिळालेल्या गुणांची गुणपडताळणी आणि उत्तरपत्रिकांच्या छायाप्रत, पुनर्मूल्यांकन व स्थलांतर प्रमाणपत्रासाठी संबंधित विभागीय मंडळाकडे ऑनलाइन पद्धतीने अर्ज करता येणार आहे. 

नोव्हेंबर-डिसेंबर 2020 पुरवणी परीक्षेतील उत्तरपत्रिकेच्या पुनर्मूल्यांकनासाठी ऑनलाइन पद्धतीने अर्ज मंडळाच्या अधिकृत संकेतस्थळावरून करण्यासाठी प्रथम उत्तरपत्रिकेची छायाप्रत घेणे अनिवार्य आहे. छायाप्रत मिळाल्याच्या दिवसापासून कार्यालयीन कामाच्या पाच दिवसांत पुनर्मूल्यांकनाच्या कार्यपद्धतीचा अवलंब करून दिलेले शुल्क भरून संबंधित विभागीय मंडळाकडे विद्यार्थ्यांनी ऑनलाइन पद्धतीने अर्ज करणे आवश्‍यक आहे. उत्तरपत्रिकेच्या पुनर्मूल्यांकनासाठी विद्यार्थ्यांनी संबंधित विभागीय मंडळाकडे संपर्क साधावा, असे आवाहन राज्य मंडळाने केले आहे.

हेही वाचा : पुणे शहरात कर्फ्यूचं स्वरुप कसं असणार? महापालिकेनं दिली माहिती

दहावी-बारावीच्या 2021मध्ये होणारी परीक्षा देणारे पुनर्परीक्षार्थी विद्यार्थी, नाव नोंदणी प्रमाणपत्र प्राप्त झालेले खासगी विद्यार्थी तसेच श्रेणीसुधार योजनेअंतर्गत प्रविष्ट होणारे व अन्य विद्यार्थ्यांची आवेदनपत्र ऑनलाइन पद्धतीने स्वीकारली जाणार आहेत. परीक्षेत उत्तीर्ण झालेल्या विद्यार्थ्यांना श्रेणी सुधार योजनेअंतर्गत परीक्षेस पुन्हा प्रविष्ट होण्याची संधी उपलब्ध करून दिली आहे. त्यानुसार नोव्हेंबर-डिसेंबर 2020च्या दहावी-बारावीच्या परीक्षेस सर्व विषय घेऊन प्रथमच उत्तीर्ण झालेल्या विद्यार्थ्यांसाठी पुढील सलगच्या दोन संधी उपलब्ध राहतील, असे डॉ. भोसले यांनी सांगितले. 

पीएमपीला दिवसभरात मिळाले साडेचार लाखांचे उत्पन्न 

गुणांच्या पडताळणीसाठी येथे करा अर्ज : 
- दहावीसाठी : "http://verification.mh-ssc.ac.in' 
-बारावीसाठी : "http://verification.mh-hsc.ac.in' 

अर्जासाठी हा असेल कालावधी 
- गुणपडताळणीसाठी :24 डिसेंबर2020 ते 2 जानेवारी 2021 
- छायाप्रतीसाठी : 24 डिसेंबर 2020 ते 12 जानेवारी 2021  

(संपादन : सागर डी. शेलार)