कवठे येमाई, ता. २१ : मोबाईलवर आलेली एपीके फाईल डाउनलोड झाल्याने मलठण (ता. शिरूर) येथील सेवानिवृत्त पोलिस कर्मचाऱ्याची ऑनलाइन फसवणूक झाली असून नेट बँकिंगच्या माध्यमातून त्यांच्या बँक खात्यातून तब्बल १७ लाख रुपये परस्पर हस्तांतर झाले आहेत. हा प्रकार सोमवार (ता. १०) ते मंगळवार (ता. १८) या काळात घडला. खात्यातील रक्कम कमी झाल्याचे लक्षात आल्यानंतर त्यांनी पोलिसांकडे धाव घेतली. शिंदे यांनी दिलेल्या फिर्यादीवरून पोलिसांनी गुरुवारी (ता. २०) गुन्हा दाखल केला. एपीके फाईलच्या माध्यमातून मोबाईलमधील गोपनीय माहितीचा गैरवापर करून हा प्रकार घडला असावा, असा अंदाज पोलिसांनी व्यक्त केला आहे. हस्तांतर झालेली रक्कम कोणत्या खात्यांमध्ये गेली तसेच या ऑनलाइन फसवणुकीमागे कोण आहे, याचा तपास पोलिस निरीक्षक विनोद पाटील करीत आहेत.