पुणे - रिक्षाचालकाच्या मुलाने तयार केलेल्या ‘रिक्षा ॲप’ला चांगला प्रतिसाद मिळू लागला आहे. रिक्षा चालकांसाठी त्याने हे ॲप तयार केले आहे. कोथरूड, सिंहगड रस्ता व कात्रज परिसरात हे ॲप सध्या मूळ धरू लागले असून, लवकरच संपूर्ण शहरासाठी ते कार्यान्वित होणार आहे.   

राहुल शितोळे या युवकाने प्रादेशिक परिवहन कार्यालय (आरटीओ) आणि वाहतूक पोलिस, रिक्षा संघटनांच्या मदतीने हे ॲप तयार केले आहे. राहुल म्हणाला, ‘‘माझे बाबा दहा वर्षांपूर्वी रिक्षा चालवायचे तेव्हा सुमारे आठशे ते नऊशे रुपयांचा गल्ला जमायचा. तेच प्रमाण आता चारशे ते पाचशे रुपयांवर आले आहे. अशी परिस्थिती केवळ माझ्या बाबांची नसून तमाम रिक्षाचालकांची आहे. त्यातच आता ओला-उबरचे संकट आले आहे. त्यामुळे रिक्षाचालकांसाठी ॲप तयार केले आहे.’’ या ॲपसाठी सुमारे ५०० रिक्षाचालकांची नोंदणी झाली. पहिल्या टप्प्यात कर्वेनगर, कोथरूड, कात्रज आदी परिसरातील नागरिकांना ही सुविधा मिळत आहे. ९८५९१९८५९१ या मोबाईल नंबरवर कॉल रजिस्ट्रेशन केला की, प्रवासी व्यक्तीला रिक्षाची स्थिती, ठिकाण व पोचण्यासाठी लागणारे भाडे आणि रिक्षा चालकाची माहिती एका क्षणात कळते. तसेच लोकेशन ट्रॅकरची सुविधाही यात आहे.

या महागाईच्या काळात रिक्षा चालविणे आणि खर्च एक जोखीम झालेली असताना. प्रवासी व भाड्याची हमी देणारी प्रणाली ‘रिक्षा ॲप’द्वारे निर्माण झाली आहे. यातून आमच्या इंशोरन्स व बेनिफिट पॉलिशिज निघत आहेत. भविष्याची जोखीम हे ॲप घेत आहे. 
- सचिन जाधव, रिक्षाचालक

‘रिक्षा ॲप’ विश्वसनीय आहे. मी कात्रज ते कोरेगाव पार्क असा रात्रीला प्रवास केला आहे. त्या वेळी माझ्या प्रत्येक लोकेशनची माहिती घरी मिळत होती. घरचे निश्‍चिंत होते.
- सुजाता गोरड, प्रवासी