शिरूर (पुणे) : कोरोनाच्या प्रादुर्भावामुळे शिरूर शहरात लॉकडाउन असतानाही शिरूरच्या बसस्थानकावर उद्दामपणे रिक्षा लावून उभ्या असलेल्या रिक्षाचालकास पोलिसांनी हटकले असता त्याने अरेरावी केली व उडवाउडवीची उत्तरे दिली. त्यामुळे संशय बळावल्याने पोलिसांनी रिक्षाची झडती घेतली असता चालकाच्या सीटखाली धारदार तलवार आढळून आली. त्यामुळे बसस्थानकावर काही काळ खळबळ उडाली.

पुण्यात नव्या निर्णयामुळे सौम्य लक्षणे असणाऱ्या रुग्णांना आणि कुटुंबांना  दिलासा

याप्रकरणी करीम इमाम शेख (वय ३२, रा. सोनार आळी, शिरूर) याला पोलिसांनी अटक केली. बेकायदा शस्त्र बाळगल्याप्रकरणी त्याच्याविरूद्ध शिरूर पोलिसांनी गुन्हा दाखल केला. त्याची एक लाख रूपये किमतीची रिक्षा (क्र. एमएच १२ केआर ४२१८) देखील पोलिसांनी या गुन्ह्यात जप्त केली असून, त्याला आज शिरूर न्यायालयासमोर उभे केले असता न्यायालयाने त्याला आजपासून पाच दिवसांची पोलिस कोठडी सुनावली. या रिक्षाचालकाने ही तलवार कोणत्या उद्देशाने ठेवली असावी, रात्रीच्या वेळी या तलवारीच्या धाकाने तो कुठले गैरकृत्य करणार होता की कुठला मोठा गुन्हा करणार होता, याचा पोलिस यंत्रणा शोध घेत आहे.

कोरोना काळात आरोग्य विभागाचे कार्यालयच बंद..कारण..

शिरूर शहरात कोरोनाचा मोठ्या प्रमाणात प्रादूर्भाव झाल्याने १८ ते २८ जुलै असा दहा दिवसांचा लॉकडाउन प्रशासनाने जाहिर केला असून, नागरिक या लॉकडाउनचे तंतोतंत पालन करताना दिसत आहेत. याच पार्श्वभूमीवर काही रिकामटेकडे लोक विनाकारण रस्त्यावर येत असल्याने प्रांताधिकारी संतोषकुमार देशमुख यांनी अशा विनाकारण रस्त्यावर फिरणारांविरूद्ध पोलिस कारवाईचे आदेश दिले आहेत. याच पार्श्वभूमीवर पोलिस निरीक्षक प्रवीण खानापुरे, पोलिस उपनिरीक्षक गणेश जगदाळे, पोलिस शिपाई उमेश जायपत्रे व होमगार्ड प्रदीप रोकडे हे वेगवेगळ्या ठिकाणी गस्त घालत होते. 

पुण्याच्या इतर बातम्या वाचण्यासाठी येथे क्लिक करा

या दरम्यान आज पहाटे तीन वाजण्याच्या सुमारास शिरूर बसस्थानक परिसरात शेख हा आपल्या रिक्षासह उभा असल्याचे दिसले. त्यामुळे जायपत्रे यांनी त्याला त्याचे नाव, पत्ता व लॉकडाउन असताना बसस्थानकावर रिक्षा घेऊन उभा असण्याचे कारण विचारले. त्यावर त्याने उलट उत्तरे दिली. त्यामुळे जायपत्रे यांचा संशय बळावल्याने त्यांनी तातडीने वरिष्ठांना या प्रकाराची माहिती देऊन रिक्षाची झडती घेतली. त्यावेळी चालकाच्या सीटखाली एका सापटीत तलवार सापडली. ही तलवार कशासाठी ठेवली, कुठून आणली असे विचारले असता शेख याने उडवाउडवीची उत्तरे दिली. तलवार बाळगण्याबाबत समाधानकारक उत्तर न मिळाल्याने करीम शेख याला पोलिस ठाण्यात नेऊन त्याच्याविरूद्ध गुन्हा दाखल करण्यात आला. ही धारदार तलवार पोलिसांनी ताब्यात घेतली असून, करीम शेख याची रिक्षादेखील जप्त केली. पोलिस निरीक्षक प्रवीण खानापुरे पुढील तपास करीत आहेत.