पुणे - महाराष्ट्र राज्य रस्ते विकास महामंडळाने (एमएसआरडीसी) (MSRDC) हाती घेतलेल्या रिंगरोडच्या (Ringroad) भूसंपादनासाठी (Land Acquisition) मार्गिकेच्या मोजणीचे काम (Counting Work) गतीने सुरू झाले आहे. दोन महिन्यांत पश्‍चिम भागातील २२ गावांतील म्हणजे सुमारे ३७० हेक्टर रिंगरोडच्या मोजणीचे काम पूर्ण झाले आहे. (Ringroad Land Aquisition Counting Work Complete in 22 Villages)

पुणे व पिंपरी-चिंचवड शहरातील वाहतूक कोंडी कमी करण्यासाठी या रिंगरोडचे काम एमएसआरडीसीने हाती घेतले आहे. या रिंगरोडचे पूर्व व पश्‍चिम असे दोन टप्पे आहेत. पूर्व रिंगरोड उर्से (ता. मावळ)- केळवडे (ता. भोर) असा आहे. पूर्व रिंगरोड हा मावळ, खेड, हवेली, पुरंदर आणि भोर तालुक्‍यातून जाणार आहे तर पश्‍चिम रिंगरोडला केळवडेपासून सुरुवात होणार असून हवेली, मुळशी आणि मावळ येथील उर्से टोलनाका येथे एकत्र येणार आहे. पश्‍चिम भागातील मार्गिकेच्या मोजणीचे कामाला २१ एप्रिल रोजी सुरुवात झाली. दोन महिन्यांत २२ गावांतील मोजणीचे काम पूर्ण झाले. पश्‍चिम भागातील चार तालुक्यांतील सुमारे ६९५.१०९९ हेक्टर जागेचे भूसंपादन करणार आहे.

मोजणी पूर्ण झालेली गावे

पिंपळोली, केमसेवाडी, जवळ, पडळघर वाडी, रिहे, घोटावडे, मातेरेवाडी, अंबटवेट, भरे, केसरआंबोली, उरवडे, आंबेगाव, काटेवाडी, सांगरून, मांडवी बुद्रुक, मालखेड, वरदाडे, खांबगाव मावळ, घेरा सिंहगड, मोरडवाडी, रांजणे आणि कुसगाव.

पश्‍चिम भागातील रिंगरोडच्या मोजणीचे काम गतीने सुरू असून, आतापर्यंत २२ गावांतील मोजणीचे काम पूर्ण झाले आहे. चार तालुक्यांतील ३७ गावांतून हा रिंगरोड जाणार आहे.

- संदीप पाटील, उपविभागीय अधिकारी, एमएसआरडीसी