पुणे, ता. ११ ः कवयित्री प्रतिमा कुलकर्णी लिखित ‘ऋतू बहराचा’ काव्यसंग्रहाचे आणि ‘फुलोरा’ ललितलेख संग्रहाचे प्रकाशन रंगत-संगत प्रतिष्ठानचे अध्यक्ष ॲड. प्रमोद आडकर आणि कवयित्री प्रभा सोनवणे यांच्या हस्ते झाले. नवी पेठेतील पत्रकार भवनात झालेल्या कार्यक्रमाप्रसंगी मधुश्री प्रकाशनचे पराग लोणकर उपस्थित होते. ‘बुद्धी आणि अंतरात्म्याच्या सुंदर मिश्रणातून कथा आणि कवितांचे लिखाण झाले आहे,’ असे गौरवोद्‌गार आडकर यांनी काढले. ‘‘नकळत्या वयात नकळतपणे कविता आयुष्यात आली आणि सखी झाली. आई-वडिलांचे प्रोत्साहन आणि अंतर्गत ऊर्मीतून लिखाण होत गेले,’’ असे कुलकर्णी यांनी सांगितले. कौस्तुभ कुलकर्णी, कावेरी कुलकर्णी यांनी स्वागत केले. कस्तुरी कुलकर्णी यांनी सूत्रसंचालन केले.