पुणे - मेट्रो खांबांची उभारणी व तांत्रिक दुरुस्तीसाठी नदीपात्रातील रस्ता वाहतुकीसाठी शुक्रवारी (ता. ८) रात्री ८ वाजल्यापासून तीन दिवसांसाठी बंद राहणार आहे. सोमवारी (ता. ११) सकाळी सातला रस्ता खुला होण्याची शक्‍यता आहे. वनाज- रामवाडी मेट्रो मार्गासाठी नदीपात्रात खांब उभारण्यासाठी हा बदल केला आहे. वाहनचालकांनी पर्यायी मार्गाचा अवलंब करावा, असे आवाहन वाहतूक पोलिसांनी केले आहे. 

नदीपात्रात ५९ खांब उभारायचे आहे. त्यातील ५८ खांब उभारण्यात आले आहे. आता एक खांब सावरकर स्मारकाच्या मागे उभारण्यात येणार आहे. त्यासाठी महामेट्रोचे अधिकारी रात्रंदिवस काम करणार आहेत. या बदलाची माहिती नागरिकांना व्हावी, यासाठी फलकही लावण्यात आले आहेत. तसेच रजपूत झोपडपट्टी ते बाबा भिडे पुलावरील वाहतूक बंद राहणार आहे. त्या बदलाची नोंद घेऊन नागरिकांनी पर्यायी मार्गाचा अवलंब करावा. 

कर्वे रस्त्यावर मेट्रो मार्गाचे काम सुरू झाले आहे. त्यामुळे केलेल्या बॅरिकेडिंगमुळे परिसरात दररोज कोंडी होत आहे. या पार्श्‍वभूमीवर आता नदीपात्रातील रस्ता बंद राहणार आहे. शनिवार- रविवारी हे सुटीचे दिवस निवडून खांब उभारण्याचे नियोजन केले आहे, असे महामेट्रोचे प्रकल्प व्यवस्थापक अतुल गाडगीळ यांनी स्पष्ट केले आहे.