सिंहगड रस्ता (पुणे) ः सिंहगड रस्त्यावरील माणिकबाग येथून सुटलेली पीएमपी बस स्वारगेटला निघाली. काही अंतरावरच चालकाच्या छातीत दुखू लागले आणि तो बेशुद्ध होऊन स्टेअरिंगवर पडला. तत्पूर्वी अशा अवस्थेतही बसचा ताबा कसाबसा सावरत चालकाने ती खांबावर धडकवल्याने बाका प्रसंग टळला.

वेळ सोमवार सायंकाळ सातची. अर्थातच त्यामुळे रस्त्यावर वाहतूकही प्रचंड होती. या गर्दीतूनच प्रवाशांनी भरलेली बस माणिकबागेतून स्वारगेटला निघाली होती. सुनील साळवे (वय 55) हे बस चालवत होते. आनंदनगर चौकाजवळ बस आली असता, साळवे यांच्या छातीत अचानक कळा निघू लागल्या. काय करावे, हेच त्यांना सुचेनासे झाले. बसवरील ताबा सुटू लागला होता; पण अशा अवस्थेतही त्यांनी कसेबसे स्वतःला सावरत बसवर ताबा मिळविला. त्यातून त्यांनी पुढे असलेल्या दुचाकीस्वारांना चुकवत बस रस्त्याच्या कडेला असलेल्या खांबाला धडकवून थांबवली. त्याचवेळी ते बेशुद्ध होऊन स्टेअरिंगवर कोसळले.

दरम्यान, अपघात झाला असे वाटून बसमधील प्रवाशांचा थरकाप उडाला. चौकात वाहतूक नियमन करीत असलेले पोलिस हवालदार मोहन मोरे यांनी लागलीच बसकडे धाव घेतली. त्यांच्यासह वाहक सतीश फुलवरे, अविनाश खंडारे व इतर प्रवाशांनी चालक साळवे यांना तत्काळ जवळच्या खासगी रुग्णालयात दाखल केले. या घटनेमुळे रस्त्यावरील वाहतूक विस्कळित झाली; पण पोलिसांनी अल्पावधीतच ती सुरळीत केली.

चालक साळवे यांचा रक्तदाब अचानक वाढल्याने ते बेशुद्ध पडले. त्यांच्यावर उपचार सुरू असून, प्रकृती नियंत्रणात आहे. त्यांनी अशा स्थितीतही प्रसंगावधान दाखविल्याने मोठा अनर्थ टळला. -मोहन मोरे, वाहतूक पोलिस