अडीच किमीची पायपीट अन्‌ जिद्दीच्या जोरावर साक्षीचे यश
वालवडच्या साक्षी जाधवर हिला दहावीत ९४.४० टक्के गुण

सकाळ वृत्तसेवा
बार्शी शहर, ता. ९ : घरची आर्थिक परिस्थिती अत्यंत बेताची... आई-वडील कधी भाजी विक्री तर कधी शेतमजुरी करून कुटुंबाचा उदरनिर्वाह करत होते. अशा प्रतिकूल परिस्थितीतही वालवड (ता. बार्शी) येथील साक्षी दादासाहेब जाधवर हिने जिद्द, मेहनत आणि चिकाटीच्या जोरावर दहावीच्या परीक्षेत ९४.४० टक्के गुण मिळवून उल्लेखनीय यश संपादन केले आहे.
कर्मवीर मामासाहेब जगदाळे यांच्या जन्मभूमीत असलेल्या कर्मवीर माध्यमिक व उच्च माध्यमिक विद्यालयात शिक्षण घेणाऱ्या साक्षीने संघर्षातून यशाची प्रेरणादायी कहाणी घडवली आहे. वालवड ते चारे हे सुमारे अडीच किलोमीटरचे अंतर ती दररोज कधी चालत तर कधी बसने पार करून शाळेत जात होती. प्रतिकूल परिस्थिती असतानाही शिक्षणाची ओढ आणि यशाची जिद्द तिने कायम ठेवली.
विशेष म्हणजे, कोणताही खासगी क्लास किंवा शिकवणी न लावता तिने हे यश मिळविले आहे. शाळेचे मुख्याध्यापक हनुमंत चव्हाण यांच्यासह सर्व शिक्षकांचे मार्गदर्शन आणि स्वतःची नियमित अभ्यासाची सवय यामुळेच हे यश शक्य झाल्याचे साक्षीने सांगितले.
कष्टाशिवाय पर्याय नाही, हे मी ओळखले होते. शिक्षकांनी शाळेत दिलेला अभ्यास रोज न चुकता करत गेले. त्याच मेहनतीचे हे फळ आहे, अशी भावना साक्षीने व्यक्त केली.