पिरंगुट, ता. ६ : जवळ (ता. मुळशी) येथील रिंगरोडच्या भिंतीवरून पडून मंगळवारी (ता. ४) सांबराचा मृत्यू झाला. स्थानिक कुत्रे या सांबराच्या पाठीमागे लागल्याने जीव वाचविण्यासाठी हे सांबर जिवाच्या आकांताने धावत होते. मात्र, रिंगरोडच्या भिंतीच्या उंचीचा अंदाज न आल्याने सुमारे पन्नास फूट खाली पडून त्याचा मृत्यू झाला. याबाबत वनविभागाचे वनपाल सागर भोसले यांनी सांगितले की, जवळ येथील मृत सांबर सुमारे आठ ते नऊ महिन्याच्या वयाचे होते. पंचनामा करून त्याची विल्हेवाट लावली आहे. दरम्यान, पश्चिम रिंगरोडच्या आखणीतील चुका आता वन्य प्राण्यांच्या जिवावर बेतल्या जात असल्याचा आरोप स्थानिकांनी केला.