‘समृद्धी’वरील लूटप्रकरणी
चौघांना जामीन मंजूर
वैजापूर (जि.छत्रपती संभाजीनगर), ता. २६ : समृद्धी महामार्गावर वाहन आडवे लावून चालकाला मारहाण व लूट केल्याच्या कथित प्रकरणात येथील जिल्हा व अतिरिक्त सत्र न्यायाधीश एस. पी. पोळ यांनी चौघा संशयितांना सोमवारी सशर्त जामीन मंजूर केला.
किरण अजिनाथ गायकवाड , अनिल जयराम जाधव, उमेश लक्ष्मण गायकवाड व ओमकार रामचंद्र फसले अशी जामीन मिळालेल्यांची नावे आहेत. २६ ऑगस्टला साहिल सोनवणे (रा. टाकळीमिया, जि. अहिल्यानगर) हे फॉर्च्युनरने समृद्धी महामार्गावरून जात असताना हडसपिंपळगाव शिवारातील एक्झिट १८ जवळ अज्ञात व्यक्तींनी वाहन आडवे लावून मारहाण करत लुटल्याची फिर्याद वैजापूर पोलीस ठाण्यात दिली होती. स्थानिक गुन्हे शाखेने तपास करत ११ जणांना ताब्यात घेतले होते. तपासाची सद्यःस्थिती आणि बचाव पक्षाचा युक्तिवाद ग्राह्य धरत न्यायालयाने चौघांना अटींवर जामीन मंजूर केला.
साखळी स्वतःच्याच मोटारीत सापडली
जामीन अर्जावरील सुनावणीदरम्यान बचाव पक्षाने महत्त्वाचे मुद्दे न्यायालयाच्या निदर्शनास आणून दिले. संशयितांकडून कोणतीही चोरीची वस्तू जप्त झालेली नाही, तसेच ओळख परेडदरम्यान तक्रारदाराला संशयितांची ओळख पटवता आली नाही, असा युक्तिवाद करण्यात आला. विशेष म्हणजे, तक्रारदाराने न्यायालयात दिलेल्या जबाबानुसार, लुटली गेल्याचा आरोप केलेली सोन्याची साखळी तक्रारदाराच्या स्वतःच्या मोटारीत चालकाच्या सीटखालीच मिळून आल्याची बाब समोर आली. हा युक्तिवाद जामीन मिळण्यात महत्त्वपूर्ण ठरला.