पुणे : माझी नसलेली संपती ईडीने (ED) जप्त केली. माझ्या वडिलोपार्जित घरावर कारवाई केली. माझ्या निकटवर्तीय लोकांवर कारवाई केली. तेव्हा मी केंद्रीय गृहमंत्री अमित शाह (Amit Shah) यांना रात्री १२ वाजता फोन केला होता. त्यांना म्हटले, मी दिल्लीत बसलो आहे. मला अटक करा. माझ्या निकटवर्तीयांना त्रास देऊ नका, असे शिवसेनेचे खासदार संजय राऊत (Sanjay Raut) म्हणाले.

पुणे येथे आयोजित कार्यक्रमात ते बोलत होते. नेहमी तुमच्या आणि महाविकास आघाडीच्या नेत्यावरच धाडी पडतात. भाजपच्या नेत्यांवर धाडी पडत नाही. याचा तुम्हाला त्रास होत नाही का, असा प्रश्न सूत्र संचालकाने संजय राऊत यांना विचारला. ‘त्रास म्हटलं तर होतो. परंतु, करून घ्यायला नको. याचं आम्ही २०२४ नंतर उत्तर देऊ. सगळ्यांचे दिवस येतात. आमचे पण दिवस येईल’, असे प्रश्नाला उत्तर देताना संजय राऊत (Sanjay Raut) म्हणाले.

हे लोक रोज म्हणतात संजय राऊत यांना अटक करू. मी बसलो आहे, कधी अटक करणार, असा प्रश्न संजय राऊत यांनी केला. निकटवर्तीयांवर कारवाई केल्यानंतर गृहमंत्री अमित शाह (Amit Shah) यांना फोन करून मला अटक करा, माझ्या निकटवर्तीयांना त्रास देऊ नका, असे स्पष्ट शब्दात सांगितले होते, मी दिल्लीतच आहो, असेही त्यांना सांगितले होते, असे राऊतांनी (Sanjay Raut) सांगितले.