पुणे, ता. २५ : पुणे आंतरराष्ट्रीय चित्रपट महोत्सवात (पिफ) जागतिक चित्रपट स्पर्धेत टिनाटीन कजरिशविली यांनी दिग्दर्शित केलेल्या ‘सिटीझन सेंट’ या चित्रपटाला उत्कृष्ट आंतरराष्ट्रीय चित्रपटाचे राज्य सरकारचे प्रभात उत्कृष्ट आंतरराष्ट्रीय चित्रपटाचे पारितोषिक मिळाले, तर जयंत सोमळकर दिग्दर्शित ‘स्थळ’ या मराठी चित्रपटाने ‘संत तुकाराम उत्कृष्ट आंतरराष्ट्रीय मराठी चित्रपटाचे पारितोषिक पटकाविले.

महाराष्ट्र सरकार आणि पुणे फिल्म फाउंडेशन यांच्या वतीने आयोजित २२व्या पुणे आंतरराष्ट्रीय चित्रपट महोत्सवाचा समारोप गुरुवारी झाला. याप्रसंगी विविध पारितोषिकांची घोषणा करण्यात आली. या वेळी महोत्सवाचे संचालक डॉ. जब्बार पटेल, नॉर्थ अमेरिका मराठी चित्रपट असोसिएशनचे अध्यक्ष अभिजित घोलप, पुणे फिल्म फाउंडेशनचे सरचिटणीस रवी गुप्ता, अखिल भारतीय मराठी चित्रपट महामंडळाचे अध्यक्ष मेघराज राजेभोसले, विश्वस्त सतीश आळेकर, ज्येष्ठ अभिनेते डॉ. मोहन आगाशे यांसह आंतरराष्ट्रीय ज्युरी, चित्रपट निवड समितीचे सदस्य उपस्थित होते.

यंदा महोत्सवात जॉर्जिया या देशातील ‘सिटीझन सेंट’ या चित्रपटाला राज्य सरकारचा ‘प्रभात उत्कृष्ट आंतरराष्ट्रीय चित्रपट’ हा १० लाख रुपयांचा पुरस्कार मिळाला, तर मराठी आंतरराष्ट्रीय चित्रपट या गटात ‘स्थळ’ या चित्रपटाला राज्य सरकारचा ‘संत तुकाराम उत्कृष्ट आंतरराष्ट्रीय मराठी चित्रपट’ हे पाच लाख रुपयांचे पारितोषिक मिळाले. भारतीय चित्रपट व दूरचित्रवाणी संस्थेतील विद्यार्थ्यांसाठी असणारे विशेष पारितोषिक आयेशा जैन या विद्यार्थिनीला देण्यात आले.

गटात मिळालेली पारितोषिके...

• चित्रपट महामंडळातर्फे देण्यात येणारे पुरस्कार पुढीलप्रमाणे :

• सर्वोत्कृष्ट चित्रपट दिग्दर्शक : श्रीकांत प्रभाकर (चित्रपट- भेरा)

• सर्वोत्कृष्ट अभिनेता : देवा गाडेकर (चित्रपट - वल्ली)

• सर्वोत्कृष्ट अभिनेत्री : स्वाती गोटावळे (चित्रपट- छबिला)

• सर्वोत्कृष्ट पटकथा : जयंत दिगंबर सोमळकर (चित्रपट- स्थळ)

• सर्वोत्कृष्ट सिनेमेटोग्राफर : विजय मिश्रा (चित्रपट- श्यामची आई)

• ज्युरीकडून विशेष पारितोषिक

• सर्वोत्कृष्ट अभिनय : बालकलाकार कबीर (चित्रपट-जिप्सी)

• सर्वोत्कृष्ट कलादिग्दर्शक : श्रीकांत प्रभाकर