पुणे - ससून रुग्णालयातून पलायन केलेल्या आरोपीचे सीसीटीव्ही चित्रीकरण पोलिसांच्या हाती लागले आहे. या गुन्ह्याच्या तपासावर पोलिस आयुक्त रितेश कुमार स्वतः लक्ष ठेवून असून, आरोपीला पकडण्यासाठी गुन्हे शाखेची पथके रवाना केली आहेत.

अमली पदार्थ विक्रीच्या गुन्ह्यात शिक्षा भोगत असलेल्या ललित अनिल पाटील या कैद्याने सोमवारी रात्री ससून रुग्णालयातून पलायन केले होते. या प्रकरणी पोलिसांनी ससून रुग्णालयाच्या आवारातून आणि रस्त्यांवरील सीसीटीव्ही चित्रीकरण ताब्यात घेतले आहे.

या प्रकरणाच्या मुळाशी जाऊन पोलिस तपास करीत आहेत. या अमली पदार्थ तस्करीमागे मोठे रॅकेट असण्याची शक्यता आहे. त्या अनुषंगाने पोलिस तपास करीत आहेत, अशी माहिती पोलिस आयुक्त रितेश कुमार यांनी ‘सकाळ’शी बोलताना दिली.