पुणे : वय झाले म्हणून जगण्याला मर्यादा घालणारे आहेतच परंतु यामध्ये उतारवयातही आयुष्य भरभरून जगणारे निश्चितच वेगळे ठरतात. असेच पुण्यातील साठीतील ६ सायकलवीरांनी पुणे ते सुंदरबन (पश्चिम बंगाल) हा तब्बल २१०० किलोमीटरचा प्रवास अवघ्या १६ दिवसात पूर्ण केला. या उपक्रमासाठी निवारा वृद्धाश्रमातील व्ही-३ फिटनेसच्या वतीने या ज्येष्ठ सायकलवीरांचा सन्मान करण्यात आला.

या प्रसंगी ज्येष्ठ सामाजिक कार्यकर्ते जुगल राठी, व्ही ३ फिटनेसचे विकास मालपुटे आदी उपस्थित होते. या उपक्रमात निरुपमा भावे, अपर्णा महाजन, एकादशी कोल्हटकर, ज्योती भक्ता, चंद्रशेखर व्यंकटरमन आणि जयंत देवधर यांनी सहभाग घेतला होता.यावेळी कोल्हटकर म्हणाल्या, ‘‘अनेकांना महिला सायकलवर प्रवास करतात याचं आश्चर्य वाटतं. आम्ही जेव्हा गावात जातो तेव्हा त्या लोकांना आमचे खूप कुतूहल वाटते. त्यांना आमच्या सायकलला हात लावायचा असतो, आमच्या बरोबर फोटो काढायचा असतो. अनेकजण आमचा सत्कार करतात तर काही लोक मदत करण्यासाठी ही पुढे येतात. त्यामुळे सायकल प्रवास हा आयुष्यातील अनुभवांची शिदोरी आहे.’’