पुणे : नागपूर-पुणे येथील छत्रपती सेवा प्रतिष्ठानच्या वतीने देण्यात येणारा ‘जिजामाता विद्वत्‌ गौरव पुरस्कार’ यंदा ज्येष्ठ गायिका लता मंगेशकर यांना प्रदान केला जाणार आहे. एक लाख ५१ हजार रुपये रोख, सन्मानचिन्ह, मानपत्र असे या पुरस्काराचे स्वरूप आहे. प्रतिष्ठानतर्फे उल्लेखनीय कार्य करणाऱ्या मान्यवरांना या पुरस्काराने सन्मानित करण्यात येते.

पुरस्काराचे यंदाचे हे ४० वे वर्ष आहे, अशी माहिती प्रतिष्ठानचे अध्यक्ष अजेय देशमुख यांनी दिली. कोरोनाच्या पार्श्वभूमीवर पुरस्कार वितरणाचा जाहीर कार्यक्रम घेता येणार नसल्याचेही प्रतिष्ठानतर्फे सांगण्यात आले आहे. प्रतिष्ठानच्या वतीने आतापर्यंत चित्रपट दिग्दर्शक भालजी पेंढारकर, साहित्यिक गो. नी. दांडेकर, शिवशाहीर बाबासाहेब पुरंदरे, ज्येष्ठ संगीतकार पं. हृदयनाथ मंगेशकर अशा मान्यवरांना ‘जिजामाता विद्वत्‌ गौरव पुरस्कारा’ने गौरविण्यात आले आहे.