पिंपळवंडी, ता.१६ : काळवाडी(ता.जुन्नर) येथे सातवा बिबट्या पिंजऱ्यात जेरबंद झाला. येथील शेतकरी देविदास तुकाराम काकडे यांच्या शेतात लावलेल्या पिंजऱ्यात बुधवारी (ता.१५) रात्री नऊच्या सुमारास पाच वर्षे वयाचा बिबट्या जेरबंद झाल्याची माहिती वनपाल संतोष साळुंखे यांनी दिली.

काळवाडी येथील लहान मुलगा बिबट्याच्या हल्ल्यात ज्याठिकाणी मृत्युमुखी पडला होता त्या जागेच्या जवळच अंतरावर लावलेल्या पिंजऱ्यात हा बिबट्या जेरबंद झालेला आहे. त्यास माणिकडोह येथील बिबट निवारा केंद्रात हलविले आहे. वनविभागास आतापर्यंत एकूण सात बिबटे जेरबंद करण्यात यश आले आहे. या बिबट्याच्या जागी दुसरे बिबटे तर येणार नाहीत ना अशी भीती नागरिकांना आहे. कारण बिबटे जेरबंद झाले तरी नवीन बिबटे पुन्हा त्याच परिसरात नागरिकांना दिसत आहेत. यावर कायमस्वरूपी उपाय करण्यात यावा अशी मागणी ग्रामस्थ करत आहेत.
वन्यजीव अभ्यासक व छायाचित्रकार आकाश डोळस यांनी सांगितले की, वाडीवस्ती वरून शाळेत जाणाऱ्या मुलांनी शाळेत जाताना-येताना घोळक्याने जाणे येणे करावे. बिबट्याचे खाद्य सामान्यतः त्याच्या उंचीएवढे असल्याने तो लहान मुलांना किंवा बसलेल्या व्यक्तीवर चुकून हल्ला करण्याची शक्यता असते. बिबट प्रवण क्षेत्रात शेतात काम करताना शक्यतो एकट्याने काम करणे टाळावे. शेतात काम करत असताना सोबत नेहमी कोणी तरी असावे व सतर्क राहूनच काम करावे.

02047