पुणे : काही दिवसांपूर्वी पुण्यात भरदिवसा कुख्यात गुंड शरद मोहोळ याची तीघांनी गोळीबार करत हत्या केली, या घटनेनंतर राज्यात एकच खळबळ उडाली होती. या हत्येनंतर पोलीसांना तत्काळ कारवाई करत आठ आरोपींना अटक देखील केली. यानंतर आता पुन्हा याप्रकरणी हत्येसाठी पिस्टल पुरवणाऱ्या दोघांना पुणे पोलिसांच्या गुन्हे शाखेने अटक केली आहे. (Sharad Mohol Murder Latest Update)

महत्वाचे म्हणजे हा गोळीबार करण्यापूर्वी आरोपीनी मुळशीत ३ वेळा सराव केल्याचा धक्कादायक माहिती समोर आली आहे. शरद मोहोळ याचा पुण्यातील त्याच्याच राहत्या घराजवळ गोळ्या झाडून खून करण्यात आला होता. आता या प्रकरणात पुणे पोलिसांनी आणखी २ जणांना अटक केली.

अटक केलेल्या या दोघांनी खून करण्यासाठी वापरण्यात आलेले पिस्टल आरोपींना पुरवले असल्याची माहिती समोर आली आहे. धनंजय मारुती वटकर आणि सतीश संजय शेडगे अशी अटक करण्यात आलेल्या दोघांची नावे आहेत. शरद मोहोळचा ५ जानेवारी भरदुपारी सुतारदरा येथील घरासमोर त्याच्यासोबत असलेल्या साहिल उर्फ मुन्ना पोळेकर व साथीदारांनी गोळ्या झाडून खून केला होता. या आरोपींनी मुळशी तालुक्यात तीन वेळा वेगवेगळ्या ठिकाणी गोळीबार करण्याचा सराव केला होता. या गुन्ह्यात आणखी आरोपी निष्पन्न होण्याची शक्यता आहे.

साहिल ऊर्फ मुन्ना संतोष पोळेकर (वय २०, रा. शिवशक्तीनगर, सुतारदरा), नामदेव महिपती कानगुडे (वय ३५, रा. भूगाव, मुळशी), अमित ऊर्फ अमर मारुती कानगुडे (वय २४, रा. स्वराज्य मित्र मंडळाजवळ, पर्वती), चंद्रकांत शाहू शेळके (वय २२, रा. जनता वसाहत, पर्वती), विनायक संतोष गव्हाणकर (वय २०, रा. पौड, मुळशी), विठ्ठल किसन गांदले (वय ३४, रा. शिवकल्याणनगर, सुतारदरा) अशी पोलिस कोठडीत वाढ केलेल्या आरोपींची नावे आहेत. मोहोळ खून प्रकरणात यापूर्वी आठ जणांना अटक केली असून, त्यापैकी या सहा जणांना न्यायालयाने १० जानेवारीपर्यंत पोलिस कोठडी सुनावली होती, त्यानंतर आरोपींच्या कोठडीत पुन्हा सात दिवसांची वाढ करण्यात आली आहे.