पुणे : पुणे शहरातील गायकवाड वाडा आणि जेधे मॅन्शन चळवळीची ही दोन्ही केंद्र अंतराने अगदी जवळ-जवळ होती. परंतु या दोन्हीमध्ये वैचारिक अंतर फार मोठे होते. या वैचारिक अंतरामुळेच दिवंगत केशवराव जेधे यांनी तत्कालीन पुणे नगरपालिकेत मुलींच्या शिक्षणाबाबत आणि हौदातील पिण्याचे पाणी दलितांना मिळावा, या मागणीसाठी मांडलेले दोन्ही ठराव नामंजूर करण्यात आले होते, अशी एक आठवण राष्ट्रवादी कॉंग्रेसचे अध्यक्ष खासदार शरद पवार यांनी मंगळवारी (ता.९) पुण्यातील एका कार्यक्रमात बोलताना सांगितली.

दिवंगत माजी खासदार केशवराव जेधे चरित्र पुस्तकाचे प्रकाशन पवार यांच्या हस्ते झाले. त्यावेळी ते बोलत होते. पवार म्हणाले, ‘‘केशवराव जेधे यांनी कायम सामाजिक परिवर्तनासाठी काम केले. यासाठी ते दलित आणि उपेक्षितांना न्याय मिळवून देण्यासाठी प्रयत्न करीत असत. त्यानुसार ते जेव्हा पहिल्यांदा नगरसेवक झाले. तेव्हा पुणे ही महानगपालिका नव्हती. तेव्हा ती नगरपालिका होती. नगरपालिकेत केशवराव जेधे यांनी पहिला ठराव पुणे शहरातील सर्व घटकांतील मुला-मुलींना शिक्षणाचा अधिकार मिळावा, असा ठराव मांडला होता. त्यांच्या या ठरावाला विरोध करण्यात गायकवाड वाड्यातील वैचारिक किनार होती. त्यातूनच पुणे नगरपालिकेत जेधे यांचा हा ठराव नामंजूर करण्यात आला.’’

जेधे यांनी दुसरा ठराव हा पुणे शहरातील हौदांमधील पिण्याचे पाणी हे दलितांना मिळाले पाहिजे, अशी मागणी करणारा ठराव मांडला होता. दुर्दैवाने याही ठरावाला विरोध करण्यासाठी गायकवाड वाडा आणि जेधे मॅन्शनमधील वैचारिक अंतरच कारणीभूत ठरले. पर्यायाने केवळ वैचारिक अंतरामुळे हे दोन्ही ठराव पुणे नगरपालिकेत मंजूर होऊ शकले नसल्याची खंत पवार यांनी यावेळी व्यक्त केली.