Shriya lavande: इच्छाशक्तीला प्रयत्नांची साथ असेल तर अनेक गोष्टी साध्य करता येतात. अशाच इच्छाशक्तीच्या जोरावर एका युवतीने पुणे ते पंढरपूर सायकल प्रवास करत सावळ्या विठ्ठलाचे दर्शन घेत आपला इच्छा पूर्ण केली आहे. श्रिया संगीता हनुमंत लवांडे असे या मुलीचे नाव आहे. या मोहिमेबद्दल तिचे कौतुक होत आहे.

बोरीपार्धी (ता. दौंड) येथील लवांडे कुटुंब सध्या सिंहगड रोड येथे राहत आहे. श्रियाने आबासाहेब गरवारे महाविद्यालयातून नुकतेच बीएस्सीचे शिक्षण पूर्ण केले आहे. महाविद्यालयात एनसीसीची छात्र असल्याने तीला धाडसीपणा नवीन नव्हता. अॅथलेटस व मॅरेथॅानमध्ये ती भाग घेत असते. श्रियाला सायकलिंगची भारी हौस आहे. तीने यापूर्वी जेजुरी, मोरगाव, अष्टविनायक अशा सायकल मोहिमा पार केल्या आहेत. तीला सायकलवरून पंढरपूरला जाण्याची इच्छा होती. ती तीने नुकतीच पुरी केली आहे.

पेडलवारी ग्रुप बरोबर 250 किलोमीटरचे अंतर कापत ती पंढरपूरला दोन दिवसांत पोचली. या मोहिमेवर जाण्या अगोदर तीने सराव करत डायटवर लक्ष केंद्रित केले. खासदार सुप्रिया सुळे नुकत्याच सिंहगड रोड भागात असताना त्यांनी श्रियाची भेट घेतली. मोहिमेबद्दल माहिती घेत त्यांनी श्रियाचे कौतुक केले.

विविध क्षेत्रात मुलांइतक्याच मुली पण पुढे येऊ लागल्या आहेत. त्यांना फक्त प्रोत्साहनाची गरज असते. संधी मिळाली की त्या पण चमकतात. मी श्रियाला सतत प्रोत्साहन देत असते. मला तीचा अभिमान आहे. जिद्दीच्या जोरावर तिने ही कामगिरी केली आहे.

- संगीता लवांडे, श्रियाची आई