हडपसर : शिवसैनिकांमध्ये समाजभान जपण्याची नैतिकता आहे. त्यामुळे महापालिकेच्या कोणत्याही प्रभागात शिवसेनेच्या नगरसेवकांची विकासकामे ही इतर नगरसेवकांच्या तुलनेत नेहमीच सरस होत असल्याचे दिसते, असे मत माजी खासदार शिवाजीराव आढळराव पाटील यांनी व्यक्त केले.

नगरसेवक प्रमोद भानगिरे यांनी प्रभाग क्रमांक २६ महमंदवाडी येथील जय भवानी चौकाचे स्वखर्चाने सुशोभीकरण करून परिसरात ठिकठिकाणी सीसीटीव्ही कॅमेरे बसविले आहेत. या सुविधेचे आढळराव पाटील यांच्या हस्ते उद्घाटन झाले, त्यावेळी ते बोलत होते.

शिवसेना जिल्हाप्रमुख विजय देशमुख , नगरसेवक प्रमोद भानगिरे, नगरसेविका प्राची आल्हाट, शहर उपप्रमुख समीर तुपे, मतदार संघ अध्यक्ष राजेंद्र बाबर तसेच तानाजी लोणकर, बाळासाहेब भानगिरे, अभिमन्यू भानगिरे, सचिन तरवडे आदिंसह शिवसेना पदाधिकारी यावेळी उपस्थित होते. नुकतीच बैलगाडा शर्यतीला सर्वोच्च न्यायालयाकडून सशर्त परवानगी देण्यात आली आहे. या लढ्यातील आढळराव पाटील यांचे योगदान लक्षात घेऊन त्यांचा यावेळी विशेष सत्कार करण्यात आला. त्यांनी यावेळी बैलगाडी सवारीही केली.

जय भवानी चौकालगत पूर्वी नागरिक कचरा टाकत होते. त्यामुळे तेथे मोठ्या प्रमाणात दुर्गंधी पसरली होती. परिसरातील सोसायट्यांमधील नागरिक या घाणीमुळे त्रस्त झाले होते. नगरसेवक भानगिरे यांनी महापालिकेचया निधीची वाट न पहाता स्वखर्चाने चौकाचे सुशोभीकरण केले. तसेच परिसरात ठिकठिकाणी सीसीटीव्ही कॅमेरे बसविले आहेत.