सकाळ न्यूज नेटवर्क
नवी दिल्ली, ता. २३ : शिवसेना हे पक्षनाव आणि धनुष्यबाण चिन्हाच्या वादाच्या खटल्याची अंतिम सुनावणी पुन्हा टळली असून सर्वोच्च न्यायालयाने यासाठी १८ फेब्रुवारीची तारीख दिली आहे. शिवसेनेसोबत राष्ट्रवादी काँग्रेस हे पक्षनाव आणि घड्याळ चिन्हाची सुनावणी देखील लांबणीवर पडली आहे.
न्यायालयाने सुनावणीसाठी २१ जानेवारीची तारीख दिली होती. त्यानंतर शुक्रवारची तारीख दिली. आता थेट पुढील महिन्यातील तारीख देण्यात आली आहे. सर्व पक्षकारांना युक्तिवादासाठी पाच तासांचा वेळ दिला जाणार असल्याचे सरन्यायाधीश सूर्य कांत यांनी स्पष्ट केले आहे. शिवसेनेत फूट पडल्यानंतर एकनाथ शिंदे यांचा गट हीच खरी शिवसेना असल्याचा व धनुष्यबाण चिन्ह या गटाकडे राहील, असा निर्वाळा निवडणूक आयोगाने दिला होता. उद्धव ठाकरे यांच्या गटाने या निकालाला सर्वोच्च न्यायालयात आव्हान दिले होते. दीर्घ काळापासून हा खटला प्रलंबित आहे.
दरम्यान, स्थानिक स्वराज्य संस्थांमधील वाढलेल्या ओबीसी आरक्षण मर्यादेच्या खटल्यावर २७ जानेवारीला सुनावणी होण्याची शक्यता आहे. ज्या ५७ स्थानिक स्वराज्य संस्थांमध्ये आरक्षणाची मर्यादा ५० टक्क्यांच्या वर गेली आहे, तेथील निवडणुकीचा निकाल न्यायालयीन निकालाच्या अधीन असेल, असे न्यायालयाने स्पष्ट केले होते. ५७ स्थानिक स्वराज्य संस्थांमध्ये ४० नगरपरिषदा आणि १७ नगर पंचायतींचा समावेश आहे.