मंचर : “केंद्रीय निवडणूक आयोगाने उद्धव बाळासाहेब ठाकरे पक्षाबाबत दिलेला निर्णय लोकशाहीच्या दृष्टीने घातक व अन्यायकारक आहे. त्यासाठी वाटेल तो त्याग करण्याची कार्यकर्त्यांची तयारी आहे.

संविधान व लोकशाहीच्या संरक्षणासाठी शिवसैनिक रस्त्यावर उतरून लढाई करतील.”असा इशारा शिवसेना उद्धव बाळासाहेब ठाकरे पक्षाचे पुणे जिल्हाप्रमुख सुरेश भोर यांनी दिला. पेठ ता.आंबेगाव येथे गुरुवारी (ता.२३) केंद्रीय निवडणूक आयोगाने दिलेल्या चुकीच्या निर्णयाच्या विरोधात भोर यांच्या नेतृत्वाखाली निषेध आंदोलन करण्यात आले.

यावेळी जिल्हा संघटक अँड.अविनाश रहाणे, तालुकाप्रमुख दिलीप पवळे, युवती तालुका अधिकारी नीलम गावडे, महिला आघाडी तालुका संघटक सुरेखा निघोट, विभाग प्रमुख बबन तोत्रे, शहर प्रमुख नंदू बोऱ्हाडे व परिसरातील शिवसैनिक उपस्थित होते.

भोर यांनी राज्य व केंद्र सरकारच्या कामकाजावर टीका केली. ते म्हणाले “धनुष्यबाण चिन्ह गद्दारांना देण्याचे काम केंद्रीय निवडणूक आयोगाने केले आहे. त्यामुळे शिवसैनिक संतप्त झाले आहेत. कायदा व सुव्यवस्थेचा बोजबारा उडाला आहे.

विरोधात वक्तव्य करणाऱ्यांना खोट्या केसेसमध्ये अडकविले जाते किंवा केंद्रीय तपास यंत्रणेमार्फत छापे टाकले जातात.स्वातंत्र्यानंतर प्रथमच हे घडत आहे. वाढत्या महागाईबाबत भाजप नेते ब्र शब्द काढत नाहीत. या अन्यायाच्या विरोधात मराठी बांधवानी एकत्र यावे.” यावेळ अँड. रहाणे व पवळे यांची भाषणे झाली.

“केंद्रीय गृहमंत्री अमित शहा यांनी शिवसेना उद्धव बाळासाहेब ठाकरे पक्षाचे पक्षप्रमुख उद्धव ठाकरे यांच्यावर अत्यंत हीन व खालच्या भाषेत टीका करणे थांबवावे. अन्यथा राज्यात कायदा सुव्यवस्थेचा प्रश्न निर्माण झाल्यास सर्वस्वी जबाबदारी शहा यांची राहील.

त्यांच्या टीकेमुळे शिवसैनिकांच्या भावना दुखावल्या आहेत. शहा यांच्या विरोधात मंचर पोलिसांनी फिर्याद घ्यावी व गुन्हा दाखल करावा.असे निवेदन अँड.अविनाश रहाणे व सुरेश भोर यांनी मंचर पोलीस ठाण्यात दिले आहे.”