पुणे :  पिरंगुट (ता.मुळशी) येथे आज पहाटे चार वाजण्याच्या सुमारास घोटावडे फाटा, पिरंगुट येथील दुकानांना भीषण आग लागली होती. दुकाने बंद होती दुकानात कोणी नव्हते. त्यामुळे जीवित हानी झाली नाही.

पीएमआरडीएच्या मारुंजी अग्निशमन केंद्रास सव्वा चार वाजण्याच्या सुमारास आग लागल्याची माहिती मिळाली. ते वीस- पंचवीस मिनिटात पोचले. त्यावेळी पहिल्यांदा किराणा दुकानामधून आग पसरत शेजारील हार्डवेअर दुकानाला पण आग लागली होती. तात्काळ 'पीएमआरडीए'अग्निशमन दलाने घटनास्थळी धाव घेतली. शर्थीच्या प्रयत्नानंतर अग्निशमन विभागाच्या कर्मचाऱ्यांनी आगीवर नियंत्रण मिळवले. साडे पाच वाजता आगीवर नियंत्रण मिळविले. त्यानंतर, सर्व परिसर कुलिंग करण्यासाठी साडे सहा वाजले होते.

ही आग विझविण्यासाठी उपअग्निशमन अधिकारी विजय महाजन यासोबत राहुल शिरोळे, वैभव कोरडे, प्रशांत अडसूळ, सुरज इंगवले, निखिल फरांदे, संदीप तांबे हे तातडीने घटनास्थळी पोचले आणि आग विझविली. योग्य वेळी मदत मिळाल्यामुळे आजूबाजूला गॅस दुकान व हॉस्पिटल होते. बाजूला आग वेळेत विझविल्याने या दुकानांच्या बाजूला आग पसरली नाही.