पौड - ‘संत तुकाराम साखर कारखान्याची निवडणूक बिनविरोध व्हावी, यासाठी उपमुख्यमंत्री अजित पवार यांना सर्वाधिकार दिले होते. त्यांनी पाचही तालुक्‍यांतील सर्वपक्षीय पदाधिकाऱ्यांची बैठक घेऊन उमेदवार निश्‍चित केले, तरीदेखील काहींनी स्वार्थासाठी बंडखोरी केली. त्यांना मतदारांनी घरचा रस्ता दाखवा,’’ असे आवाहन कारखान्याचे अध्यक्ष व माजी खासदार विदुरा नवले यांनी केले. 

ताज्या बातम्यांसाठी डाऊनलोड करा ई-सकाळचे ऍप

ताथवडे (ता. मुळशी) येथे कारखान्याच्या निवडणुकीतील सर्वपक्षीय पॅनेलच्या नियोजनासाठी झालेल्या बैठकीत नवले बोलत होते. या वेळी ज्ञानेश्‍वर लांडगे, दिगंबर भेगडे, बापूसाहेब भेगडे, माउली दाभाडे, बाळासाहेब भेगडे, दिगंबर काळभोर, अशोक मोरे, महादेव कोंढरे, शांताराम इंगवले, सुभाष अमराळे, सुनील चांदेरे, गंगाराम मातेरे आदी उपस्थित होते.

नवले म्हणाले, ‘‘शरद पवार यांचा आशीर्वाद व दूरदृष्टीमुळे या कारखान्याची उभारणी झाली. कारखाना उभारणीवेळी अनेकजण, ‘त्यात भाताचा पेंढा घालणार का?’ असं म्हणत होते. परंतु, हाच कारखाना ऊस उत्पादनात भारतात पहिला आला. सभासदांचा विश्वास आणि संचालकांच्या प्रामाणिक प्रयत्नामुळे कारखाना प्रगतिपथावर आहे.’’ 

या वेळी विदुरा नवले, बाळासाहेब बावकर, तुकाराम विनोदे (हिंजवडी- ताथवडे गट), दिलीप दगडे, अंकुश उभे, महादेव दुडे (पौड- पिरंगुट), बापूसाहेब भेगडे, ज्ञानेश्‍वर दाभाडे, शिवाजी पवार (तळेगाव- वडगाव गट), प्रवीण काळजे, मधुकर भोंडवे, दिनेश मोहिते, अनिल लोखंडे (खेड- शिरूर- हवेली गट), ताराबाई सोनवणे, शुभांगी गायकवाड, बाळकृष्ण कोळेकर, चेतन भुजबळ, बाळू गायकवाड या उमेदवारांनी आपला परिचय दिला. तसेच, सोमाटणे- पवनानगर गटातून बिनविरोध आलेले नरेंद्र ठाकर, सुभाष राक्षे, श्‍यामराव राक्षे यांचे अभिनंदन केले.