खोडद, ता. ११ : श्रावणी बैल पोळ्यानिमित्त खोडद (ता. जुन्नर) येथे गुरुवारी (ता. १०) बैलपोळ्याचा सण साजरा करण्यात आला. डिजेला फाटा देत संबळ, ताशा, सनई या पारंपारिक वाद्यांमध्ये बैलांची मिरवणूक काढण्यात आली. ग्रामीण भागातील पारंपरिक खेळ म्हणून ओळखला जाणारा लेझीम खेळ यावेळी खेळण्यात आला.
खोडद गावातील व परिसरातील अनेक शेतकऱ्यांनी आपापल्या बैलांना अंघोळ घालून स्वच्छ केले होते.त्यांच्या कपाळावर कुंकू-हळदीचा टिळा लावून फुलांच्या माळांनी बैलांची सजावट करण्यात आली. त्यांच्या अंगावर झालर घातली. शिंगांना रंग लावून गोंडे बांधले होते. डोळ्यांना काजळ लावून, गळ्यात घुंगरमाळ आणि पुष्पहार घालून, बैलांच्या अंगाखांद्यावर गुलाल, भंडाऱ्याची उधळण करून बैलांना साजशृंगार करून गावातून वाजत गाजत मिरवणूक काढली.
श्रावणी बैलपोळा साजरा करण्यासाठी शुक्रवारी सकाळी खोडद येथे बैठक झाली. यामध्ये बैलजोड्या मिरवणुकीसाठी पहिल्या पाच मानाच्या बैलजोड्यांची लिलाव पद्धतीने  निवड करण्यात आली. निकिता गायकवाड, सुदाम गायकवाड, संतोष मुळे, पंढरीनाथ खरमाळे, रवींद्र वामन, रोहिदास डोके, सुजन घंगाळे यांनी बैलपोळा मिरवणुकीचे लिलाव घेतले होते. गुरुवारी सायंकाळी गावातील हनुमान मंदिरापासून बैलांची मिरवणूक काढण्यात आली होती. येथील चौकात मिरवणूक आल्यानंतर पारंपारिक पद्धतीने लेझीम खेळ खेळण्यात आला. लिलाव घेणाऱ्या बैल मालकांचा यावेळी सन्मान करण्यात आला. ग्रामदैवत श्री जगदंबा मातेच्या प्रांगणात बैलांची मिरवणूक आणल्यानंतर देवीचे दर्शन घेऊन बैलपोळ्याची सांगता झाली.