जुन्नर : श्री क्षेत्र लेण्याद्री (ता. जुन्नर) येथे आज (शुक्रवार) संकष्टी चतुर्थी निमित्त भाविक भक्तांनी गर्दी केली होती. दिवसभरात सुमारे १० ते १५ हजार भाविकांनी श्रींच्या दर्शनाचा लाभ घेतला.

आज पहाटे ४ वाजता देवस्थानचे खजिनदार सदाशिव ताम्हाणे यांच्या हस्ते श्रींचा अभिषेक व महाआरती करण्यात आली. यावेळी अध्यक्ष गोविंद मेहेर, सेक्रेटरी शंकर ताम्हाणे, विश्वस्त प्रभाकर जाधव, मच्छिंद्र शेटे, काशिनाथ लोखंडे,जयवंत डोके, जितेंद्र बिडवई, संजय ढेकणे, भगवान हांडे व कर्मचारी तसेच भाविक उपस्थित होते.
संकष्टी चतुर्थी निमित्त श्री गिरिजात्मजकाच्या मूर्तीस व गाभाऱ्यास फुलांची आकर्षक सजावट करण्यात आली होती. सकाळी ६:०० वाजता व दुपारी १२:०० वाजता महाआरती करण्यात आली. देवस्थान मार्फत भाविकांना विविध सेवा पुरविण्यात आल्या. सायंकाळी मंदिरात श्री मुक्ताई भजनी मंडळ, शिवेची वाडी यांचे भजन झाले. चंद्रोदयाच्या वेळी भाविकांच्या उपस्थितीत श्रींची महाआरती करण्यात आली. नंतर महाप्रसादाचे आयोजन करण्यात आले होते. दिवसभरात विविध धार्मिक कार्यक्रम झाले. दर्शनासठी भाविकांनी सकाळी व सायंकाळी गर्दी केली होती.

दिवसभरात विविध क्षेत्रातील मान्यवर, जुन्नर व परिसरातुन तसेच पुणे,नगर, मुंबई, ठाणे, नाशिक येथून भाविक श्रींच्या दर्शनासाठी येत होते अशी माहिती अध्यक्ष गोविंद मेहेर व सेक्रेटरी  शंकर ताम्हाणे यांनी दिली.