वाल्हे, ता. ९ : दहावीच्या निकालात ''नो कॅंडिडेट'' असा उल्लेख झाल्याने चर्चेत आलेल्या जेजुरीतील श्रेया संतोष वाईकर या विद्यार्थिनीचा निकाल अखेर जाहीर झाला आहे. तिला ८७.८० टक्के गुण मिळाले असून, या निर्णयामुळे विद्यार्थिनीसह पालक आणि शाळा प्रशासनाला मोठा दिलासा मिळाला आहे.
जेजुरी येथील जिजामाता इंग्लिश मिडियम स्कूलमधील श्रेयाने दहावीची परीक्षा दिली होती. मात्र, शुक्रवारी ऑनलाइन निकालात तिचा निकाल दिसला नाही. पालकांनी पुणे बोर्डाकडे धाव घेतली असता, प्रणालीमध्ये ''नो कॅंडिडेट'' अशी नोंद असल्याचे समोर आले. विद्यार्थिनीकडे सर्व अधिकृत कागदपत्रे असतानाही असा निकाल आल्याने पालकांनी संताप व्यक्त केला होता. बोर्डाच्या ऑनलाइन प्रणालीतील त्रुटी की शाळा स्तरावरील चूक, याबाबत चौकशीची मागणी करण्यात आली.
या प्रकरणाची दखल घेत बोर्डाच्या सहाय्यक सचिव वैशाली काळे यांनी तपास केला. तांत्रिक अडचणीमुळे हा प्रकार घडल्याचे स्पष्ट करत, शनिवारी सायंकाळी श्रेयाला तात्पुरत्या निकालाची प्रत देण्यात आली. ऑनलाइन निकाल अद्याप दिसत नसल्याने तांत्रिक यंत्रणेवर प्रश्नचिन्ह उपस्थित होत आहे. या प्रकरणातील दोषींची चौकशी करण्याची मागणी श्रेयाचे वडील संतोष वाईकर यांनी केली आहे.

संकेतस्थळावर गुणपत्रक उपलब्ध होण्यासाठी काही तांत्रिक अडचणी आल्याने ही समस्या निर्माण झाली. तसेच संबंधित विद्यार्थिनीची निकालाची प्रत पालकांकडे देण्यात आली आहे.
- वैशाली काळे, सहाय्यक सचिव, महाराष्ट्र राज्य माध्यमिक व उच्च माध्यमिक शिक्षण मंडळ