शिनोली (पुणे) : कोरोना विषाणूच्या महामारीमुळे बारा ज्योतिर्लिंगांपैकी सहावे असणारे श्री क्षेत्र भीमाशंकर मंदिर  जिल्हाधिकारी यांच्या आदेशान्वये श्रावण महिन्यातही बंद राहणार आहे. त्यामुळे देशातील भाविकांनी व विषेशतः पुणे जिल्ह्यातील नागरिकांनीही भीमाशंकराचे दर्शन घेण्यासाठी येऊ नये, असे आवाहन भीमाशंकर देवस्थानचे विश्वस्त मधुकर  गवांदे यांनी केले आहे.  

श्री क्षेत्र भीमाशंकर येथे श्रावण महिन्याच्या पार्श्वभूमीवर बैठक आयोजित करण्यात आली. या वेळी घोडेगाव पोलिस ठाण्याचे सहायक पोलिस निरीक्षक प्रदिप पवार, देवस्थानचे विश्वस्त मधुकर गवांदे, रत्नाकर कोडीलकर, दत्ता कौदरे, गोरक्षनाथ कौदरे आदी उपस्थित होते. आजपासून श्रावणमास सुरू झाला आहे. श्री क्षेत्र भीमाशंकर येथे दरवर्षी भरणारी श्रावण महिन्यातील यात्रा कोरोनाच्या पार्श्वभुमीवर रद्द झाली आहे. त्यामुळे भाविकांनी दर्शनासाठी येऊ नये. तसेच, खेड, आंबेगाव व इतर जवळील तालुक्यातील नागरिकांनीही दर्शन व्हावे, यासाठी आग्रह करू नये. तसेच, पोलिस प्रशासनाने ब्लू मॉरमॉन हॉटेलकडून व पोखरी घाटातून येणारे रस्ते ज्या ठिकाणी एकत्र होतात, तेथील पालखेवाडी येथे बंदोबस्त नेमावा, अशी सूचना या वेळी मधुकर गवांदे यांनी केली.

डिंभे, पालखेवाडी व श्री क्षेत्र भीमाशंकर येथे पोलिसांनी चेकपोस्ट उभारले आहे. त्यामुळे या भागात श्री क्षेत्र भीमाशंकरचे दर्शन व पर्यटनासाठी आढळून आल्यास संबंधिताची गाडी जप्त करून कायदेशीर कारवाई करून गुन्हे दाखल करणार आहे. त्यामुळे येणाऱ्या भाविकांनी व पर्यटकांनी प्रशासनास सहकार्य करावे. अन्यथा, येणाऱ्यांवर कायदेशीर कारवाई केली जाईल, असा इशारा सहायक पोलिस निरीक्षक प्रदिप पवार यांनी दिला आहे.