पुणे : अक्कलकोट येथील स्वामी समर्थ अन्नछत्र मंडळातून श्री स्वामी समर्थ पालखी पुण्यात दाखल झाली असून बुधवारी (ता. २८) सायंकाळी सहा वाजता मंडईमधील श्री शारदा गजानन मंदिरापासून मिरवणूक काढण्यात येणार आहे.

पालखी पादुका दर्शन सोहळ्यानिमित्त तीन मार्चपर्यंत महापालिकेजवळील काँग्रेस भवन येथे विविध कार्यक्रमांचे आयोजन करण्यात आले आहे. अण्णा थोरात, विनायक घाटे, विजय काजळे, नामदेवराव मोहिते, राजाभाऊ वरखडे, विलास चव्हाण यांनी कार्यक्रमाचे आयोजन केले आहे.

सहाय्यक पोलिस आयुक्त रुक्मिणी गलंडे आणि वरिष्ठ पोलिस निरीक्षक दीपाली भुजबळ यांच्या हस्ते पालखी पादुका पूजन आणि आरती करून मिरवणुकीला प्रारंभ होईल. २९ फेब्रुवारी रोजी सायंकाळी सात वाजता हर्षद कुलकर्णी हे ‘स्वामी भक्ती गीते’ सादर करतील.

शुक्रवार एक मार्च रोजी सायंकाळी सात वाजता श्री साई नवनाथ भजनी मंडळ, गुरुवर्य साईभक्त बाळासाहेब परदेशी ग्रुप भजन आणि साई भक्त गजेंद्र परदेशी व सहकलाकार यांचे सादरीकरण होईल, तर दोन मार्च रोजी सायंकाळी सात वाजता मुकुंद बादरायणी हे ‘स्वर समर्थ अभंगवाणी’ हा कार्यक्रम होईल.

तसेच यंदाचा ‘श्री स्वामी समर्थ पुरस्कार बाळासाहेब रामचंद्र ठोंबरे’ यांना जाहीर झाला असून पुरस्काराचे वितरण येत्या तीन मार्च रोजी होणार आहे. उत्सवात सर्व दिवस रक्तदान महायज्ञ हा उपक्रम राबविण्यात येणार आहे.