पुणे - रशियाच्या काझानमध्ये नुकत्याच पार पडलेल्या आंतरराष्ट्रीय कौशल्य ऑलिम्पिक "वर्ल्ड स्किल्स' स्पर्धेत ग्राफिक डिझाइन टेक्‍नॉलॉजी प्रकारात श्वेता रतनपुरा हिने ब्रॉंझपदक पटकावले आहे. देशासाठी या प्रकारात ब्रॉंझपदक पटकावणारी श्वेता ही पहिली भारतीय विद्यार्थिनी ठरली आहे.

केंद्र सरकारच्या "राष्ट्रीय कौशल्य विकास मिशन'अंतर्गत श्वेताने देशाचे प्रतिनिधित्व केले. तिच्या या कामगिरीबद्दल शहरातील "डिझाइन मीडिया आणि एंटरटेन्मेंट' स्कूलच्या वतीने तिचा सत्कार करण्यात आला. या वेळी उद्योजक जयप्रकाश श्रॉफ, डिझाइन मीडियाचे संचालक आणि श्वेताचे मार्गदर्शक सतीश नारायणन, श्रीदेवी सतीश, श्वेताचे वडील विनीतकुमार, आई अमिता, विप्लव पाटीदार आदी उपस्थित होते.
63 देशांमधील 1354 स्पर्धकांनी यामध्ये सहभाग घेतला होता. 44 विविध प्रकारच्या कौशल्यांसह 48 जणांचा भारतीय संघ या स्पर्धेत उतरला होता. आंतरराष्ट्रीय पातळीवर भारतीय संघाने इतिहास रचत एक सुवर्ण, एक रौप्य, दोन ब्रॉंझ यांसह 15 स्पर्धकांनी "मेडल ऑफ एक्‍सलन्स' मिळविले आहे.

जगभरातील 35 स्पर्धकांशी माझा सामना होता. स्पर्धेसाठी नारायणन यांचे मार्गदर्शन, आई-वडिलांचा पाठिंबा आणि नियमित व्यायाम, योगा व ध्यान उपयुक्त ठरले. शारीरिक आणि मानसिक स्वास्थ्य चांगले ठेवतानाच माझ्यातील नकारात्मक गोष्टी शोधून काढल्या आणि त्यावर काम केले.
- श्वेता रतनपुरा