किरकटवाडी : कित्येक दिवसांपासून काम रखडलेल्या सिंहगड रस्त्याची गोऱ्हे बुद्रुक ते डोणजे फाट्या दरम्यान अक्षरशः चाळण झाल्याचे चित्र आहे.त्यामुळे नवीन रस्ता तर नाहीच किमान खड्डे तरी बुजवावेत अशी  मागणी या भागातील नागरिक करत आहेत. रस्त्यावर मोठमोठे खड्डे असल्याने वाहन चालकांना मोठी कसरत करावी लागत आहे.

सध्या पावसाचे दिवस असल्याने रस्त्यावर पडलेल्या मोठमोठ्या खड्ड्यांमध्ये पाणी साचत आहे‌‌. खड्ड्यांमध्ये पाणी असल्याने वाहनचालकांना अंदाज येत नाही परिणामी दुचाकी चालकांचे अनेक अपघात या खड्ड्यांमुळे झालेले आहेत. चार चाकी वाहन चालकांनाही खड्डे चुकवताना मोठी कसरत करावी लागत आहे.

ताज्या बातम्यांसाठी डाऊनलोड करा ई-सकाळचे ऍप 

 गोऱ्हे बुद्रुक, डोणजे, गोऱ्हे खुर्द, खानापूर, मालखेड, घेरा सिंहगड, वरदाडे, आंबी, सोनापूर यांसह वेल्हे तालुक्यातील पानशेत सह अनेक गावांसाठी दळणवळणासाठी एकमेव सिंहगड रस्त्याचा आधार आहे. मागील दोन-तीन वर्षांपासून या रस्त्याचे काम रखडल्यामुळे नागरिकांसह पर्यटकांचीही गैरसोय होत आहे. नांदेड फाट्यापासून किरकटवाडी फाट्यापर्यंतही या रस्त्याची अत्यंत दुर्दशा झालेली आहे. रस्ता पूर्ण होत नाही परंतु सार्वजनिक बांधकाम विभागाच्या अधिकाऱ्यांनी ठेकेदाराकडून किमान खड्डे तरी बुजवून घ्यावेत अशी मागणी या भागातील नागरिक करत आहेत.

 "प्रशासनाने किमान खड्डे तरी बुजवावेत. खराब रस्त्यामुळे वाहनांचे तर नुकसान होत आहेच शिवाय नागरिकांच्याही जीवाला धोका निर्माण झालेला आहे. डी आय.ए.टी. ते गोऱ्हे बुद्रुक दरम्यान रखडलेले कामही तातडीने सुरू करण्यात यावे.-राम खिरिड, नागरिक, गोऱ्हे बुद्रुक.

सिंहगड रस्त्याचे रखडलेले काम तात्काळ सुरू करण्यासंदर्भात ठेकेदाराला बजावले आहे. जवळपास 20 किलोमीटरचे अंतर वन हद्दीतून जात असल्याने त्यासंदर्भात वन विभागाकडून परवानगी मिळण्यात अडचणी येत होत्या. ज्या ज्या ठिकाणी रस्त्यावर मोठमोठे खड्डे आहेत तेथील खड्डे बुजवून घेण्यास ठेकेदाराला सांगण्यात आलेले आहे. स्वतः उभं राहून काही ठिकाणचे खड्डे बुजवून घेतले आहेत.-ज्ञानेश्वर राठोड, सार्वजनिक बांधकाम विभाग शाखा अभियंता

पुण्याच्या बातम्या वाचण्यासाठी येथे  क्लिक करा

(Edited by : Sagar Diliprao Shelar)