सिंहगड रस्ता, ता. १५ : राजाराम पुलाच्या पुढे तुटलेल्या केवळ एका चेंबरमुळे सिंहगड रस्ता परिसरात नागरिकांना वाहतूक कोंडीत सामोरे जावे लागले.

सिंहगड रस्त्याला विठ्ठलवाडी कडून दांडेकर पुलाकडे जाताना; फडके गणपती आणि वीर बाजी पासलकर सभागृह या भागातील पलीकडच्या रस्त्याला एक चेंबर तुटला होता. या चेंबरचे झाकण तुटल्यामुळे त्या ठिकाणी वाहन चालवण्यात अडचण निर्माण झाली. एका बाजूला पुलाचे काम दुसऱ्या बाजूला तुटलेला चेंबर यामुळे वाहतूक अतिशय धीम्या गतीने पुढे सरकत होती.

(Pune Traffic News)

परिणामी जनता वसाहत कडे जाणारा कालव्याशेजारील रस्ता, चावट पाटील चौक, आनंद विहार शेजारील रस्ता, विश्रांती नगर येथील प्रकाश इनामदार चौक, यासह सिंहगड रस्त्याला दोन्ही बाजूला वाहतूक कोंडी झाली. सकाळी साडेआठच्या सुमारास सुरू झालेली वाहतूक कोंडी दुपारी बारा वाजेपर्यंत कायम होती. केवळ तुटलेल्या एका चेंबरमुळे सर्व नागरिकांना नाहक त्रास सहन करावा लागला. प्रशासनाचे होत असलेले दुर्लक्ष कारणीभूत असल्याचे नागरिकांचे म्हणणे आहे.