पुणे, ता. १७ : शाहीरविशारद डॉ. आझाद नायकवडी फाउंडेशनतर्फे सीओईपी टेक्नॉलॉजिकल युनिव्हर्सिटीच्या प्रथम वर्षातील विद्यार्थ्यांसाठी सोशल इंटर्नशिप कार्यक्रमांतर्गत विविध सामाजिक उपक्रम उत्साहात झाले. याप्रसंगी सुमारे ३०० विद्यार्थी-विद्यार्थिनी सहभागी झाले होते.
या वेळी ससून रुग्णालयातील ‘सोफोश’ संस्थेला अन्नधान्य स्वरूपात मदत करण्यात आली. पुणे जिल्ह्याचे अतिरिक्त जिल्हाधिकारी सतीश राऊत यांच्या प्रमुख उपस्थितीत झालेल्या कार्यक्रमात अध्यक्ष डॉ. आझाद नायकवडी यांनी प्रास्ताविक केले. ‘सोफोश’च्या मृण्मयी पत्रिकर यांनी संस्थेची माहिती दिली. राऊत यांनी फाउंडेशनचे कार्य समाजाला दिशा देणारे असल्याचे सांगितले. कार्यक्रमाच्या चौथ्या दिवशी बुधवार पेठेतील देवदासी महिलांच्या मुलांना ‘राजा शिवाजी’ हा ऐतिहासिक चित्रपट दाखविण्यात आला. विद्यार्थ्यांना शालेय साहित्य व खाऊचे वाटप केले. पोलिस अधिकारी मनीषा डुबुले यांच्या प्रमुख उपस्थितीत हा उपक्रम पार पडला.